ಬೆಟ್ಟದ ತುದಿಯಿಂದ ಜಿಗಿದು ಆತ್ಮಹತ್ಯೆ ಮಾಡಿಕೊಳ್ಳಬೇಕೆಂದು ತಿಮ್ಮ ತೀರ್ಮಾನಿಸಿದ. ಅಲ್ಲಿಗೆ ತಲುಪುವುದೇ ಸಾಹಸದ ಕೆಲಸವಾಗಿತ್ತು.ಆದರೆ ಶ್ರಮಿಕನಾದ ತಿಮ್ಮನಿಗೆ ಅದೊಂದು ಸಾಮಾನ್ಯ ಬೆಟ್ಟವಾಗಿತ್ತು.
ಬೆಟ್ಟದ ತುದಿ ತಲುಪಿದ. ದೂರದಲ್ಲಿ ಗುಂಪೊಂದು ಸಿಳ್ಳೆಹಾಕಿಕೊಂಡು ಬರುತ್ತಿತ್ತು. ವಾರಾಂತ್ಯದ ರಜೆಯಲ್ಲಿ ಬೆಟ್ಟ ಹತ್ತಲು ಬಂದ ಗುಂಪಾಗಿತ್ತು ಅದು.
ಕ್ರಮೇಣ ಧ್ವನಿ ಕ್ಷೀಣಿಸತೊಡಗಿತು. ಅವರೆಲ್ಲಾ ಬೆಟ್ಟ ಹತ್ತಲಾಗದೆ ಕುಸಿದು ಕುಳಿತಿದ್ದರು.
ಆ ಗುಂಪಿನಲ್ಲಿದ್ದ ಕೆಲವರು ಗುಡ್ಡದ ತುದಿಯಲ್ಲಿದ್ದ ತಿಮ್ಮನನ್ನು ಗುರುತಿಸಿದರು. 'ಅಷ್ಟು ಕಡಿದಾದ ಬೆಟ್ಟಕ್ಕೆ ಒಬ್ಬನೇ ಹತ್ತಿದ್ದಾನೆ ವಾವ್ ' ಎಂದು ಸಿಳ್ಳೆಹಾಕತೊಡಗಿದರು.
ಅದು ತಿಮ್ಮನಿಗೂ ಕೇಳಿಸಿತು( ಮುಂದೇನಾಯಿತು ಎಂಬುದು ತಿಮ್ಮನಿಗೂ ನೆನಪಿಲ್ಲ ).
*
ಕಾಜೂರು ಸತೀಶ್
