ಬಯಕೆ

ಒಂದು ಸಟ್ಟುಗ ಹಿಡಿದು

ಆಕಾಶವನ್ನು ತಿರುವಿಹಾಕುತ್ತೇನೆ

ತಳಹಿಡಿದು ಕಪ್ಪಾದ ಹಗಲನ್ನು

ರಾತ್ರಿಯೆಂದು ಹೆಸರಿಟ್ಟು ಬಡಿಸುತ್ತೇನೆ

ಬೆಳದಿಂಗಳನ್ನು

ತೆಂಗಿನ ಚಟ್ನಿಯ ಹಾಗೆ

ಮೇಲೆ ಹರಡುತ್ತೇನೆ

ಖಾರ ಚಟ್ನಿ ತಿನ್ನುವ ಆಸೆಯಾಗುತಿದೆ

ಸಮುದ್ರದಲ್ಲಿ ಬೆರಳನ್ನದ್ದಿ 

ಮುಳುಗುವ ಸೂರ್ಯನನ್ನು 

ಮೇಲಕ್ಕೆತ್ತಿ ಕರಕರ ತಿನ್ನುತ್ತೇನೆ 

ಹಾ! ಖಾರವಾಗಿ 

 ಕಣ್ಣಿಂದ ನೀರಿಳಿಯುತ್ತಿದೆ 

ನನ್ನ ಹೊಟ್ಟೆಯಲ್ಲಿ 

ಕಾಡು ಮೇಡು ಬೆಟ್ಟ ಗುಡ್ಡ 

ಸುಮುದ್ರಗಳೆಲ್ಲ ಬೆಳಕು ಬೆಳಕೆಂದು 

ಚೀರಾಡುತ್ತಿದೆ 

ಈ ರಾತ್ರಿ 

ಪ್ರಪಂಚ ನನ್ನ ಹೊಟ್ಟೆಯಲ್ಲಿ 

ತಣ್ಣಗೆ ಮಲಗಿರಲಿ 

*

ಮಲಯಾಳಂ ಮೂಲ- ಸ್ಮಿತಾ ಶೈಲೇಶ್ 

ಕನ್ನಡಕ್ಕೆ - ಕಾಜೂರು ಸತೀಶ್ 

ಚಿಟ್ಟೆ

ಉದುರುವ ಹೂವುಗಳು

ಚಿಟ್ಟೆಗಳಾಗಿ

ಭೂಮಿಗೆ ಮರಳುತ್ತವೆಂದು

ಮಗುವಿಗೆ ಅಮ್ಮ ಹೇಳಿದ್ದರು

ಮಗು

ಮುಂದೊಂದು ದಿನ

ಓದಿ ಮೇಷ್ಟ್ರಾಯಿತು.

ಅಮ್ಮ ಹೇಳಿಕೊಟ್ಟ

ಅದೇ ಕಥೆಯನ್ನು

ಮೇಷ್ಟ್ರು ಮಕ್ಕಳಿಗೆ ಹೇಳಿದರು 

ಮಕ್ಕಳು ನಕ್ಕರು 

'ಎಂಥಾ ಪೆದ್ದ ಮೇಷ್ಟ್ರು!'

ಆದರೆ, 

ಅಷ್ಟು ಮಕ್ಕಳ ಪೈಕಿ 

ಒಬ್ಬಳು ಮಾತ್ರ ಅತ್ತಳು 

ಮೇಷ್ಟ್ರ ಹಾಗೆ 

ಅವಳಿಗೂ ಅಮ್ಮನಿರಲಿಲ್ಲ.

*

ಮಲಯಾಳಂ ಮೂಲ - ಹರೀಶ್ ಶಕ್ತಿಧರನ್ 

ಕನ್ನಡಕ್ಕೆ- ಕಾಜೂರು ಸತೀಶ್ 

ಗಂಡ ತೀರಿಕೊಂಡವಳ ಮೊದಲ ಸ್ವಾತಂತ್ರ್ಯ ಸಂಗ್ರಾಮ

ಗಂಡ ತೀರಿಕೊಂಡ ಹದಿನಾರನೆಯ ದಿನ

ಮನೆಯೊಂದು ಅಕ್ಷರಶಃ ಶ್ಮಶಾನವೆನಿಸಿತವಳಿಗೆ

ತಿಥಿಯೂಟ ಉಂಡು ಹಸಿವು ನೀಗಿಸಿಕೊಂಡ

ಕಾಗೆಗಳೂ 

ಹಲಸಿನ ಕೊಂಬೆಯಲ್ಲಿ ಕುಳಿತು

ದುರುಗುಟ್ಟಿ ನೋಡುತ್ತಿರುವುದು ಕಾಣಿಸಿತವಳಿಗೆ 

ಎಲ್ಲ ತೆರಳಿದ ಮೇಲೆ

ಆಚೆ ಈಚೆ ಮಕ್ಕಳಿಬ್ಬರನ್ನು ಎದೆಗಪ್ಪಿಕೊಂಡು

ಮಲಗಲು ಹೊರಟಾಗ 

ಮನೆಯ ಹೊರಗೆ

ಚಪ್ಪಲಿಗಳು ಮಣ್ಣ-ಮರಳ ಕಣಗಳ ತುಳಿತುಳಿದು

ಉಸಿರುಗಟ್ಟಿಸುವ ಸದ್ದು ಕೇಳಿಸಿತವಳಿಗೆ

ದಿನಸಿ ಅಂಗಡಿಯಲ್ಲಿ 

ಪದಾರ್ಥಗಳ ಪಟ್ಟಿ ಹೇಳುವಾಗ

ಸಿಗರೇಟಿನ ಕರೆಯಂಟಿದ

ಕಪ್ಪುತುಟಿಯೊಂದು ಬಳಿಬಂದು

 ವಿಕೃತ ನಗುವೊಂದನ್ನು ಎಸೆದುಹೋಯಿತು

ಮುಂಜಾನೆ ಎದ್ದು

ಟೈಲರ್ ಅಂಗಡಿಗೆ ಕೆಲಸಕ್ಕೆ ತೆರಳುವಾಗ

'ನೋಡ್ನೋಡು.. ಶೀಲಾವತಿ ಹೇಗೆ ಡ್ರೆಸ್ ಮಾಡ್ಕೊಂಡು ಹೋಗ್ತಿದ್ದಾಳೆ

ಯಾರನ್ನು ಮರುಳು ಮಾಡ್ಲಿಕ್ಕೋ ಏನೋ'

ಎಂಬ ಅಪವಾದದ ಬಾಣ ನೇರ ಎದೆಗೇ ಬಿತ್ತು

ಪಡಿತರ ಚೀಟಿಯಲ್ಲಿ

ಗಂಡನ ಹೆಸರು ತೆಗೆದುಹಾಕಿ

ಅಕ್ಕಿ ಗೋಧಿಯನ್ನು ಕಡಿತಗೊಳಿಸಿದಾಗಲೇ

ಅವರು ಬಹುದೂರ ಕೆಲಸಕ್ಕೆ ತೆರಳಲಿಲ್ಲವೆಂದೂ

ಮತ್ತೆ ಮರಳಿ ಬರುವುದಿಲ್ಲವೆಂದೂ

ಮನದಲ್ಲಿ ಅಂದುಕೊಂಡಿದ್ದು

ಮಕ್ಕಳ ಪ್ರಗತಿ ಪತ್ರದಲ್ಲಿ 

ಸಹಿಮಾಡುವಾಗ

ಏಕಾಂಗಿಯೊಬ್ಬಳು ಏರಬೇಕಾದ

ಹಿಮಾಲಯದ ಮೆಟ್ಟಿಲುಗಳು

ಹಿಮಸುರಿದು ಭಾರವೆನಿಸಿದವು

ಸಂಜೆ ಮನೆಗೆ ತೆರಳಲು

ಗಡಿಬಿಡಿಯಿಂದ ನಡೆಯುವಾಗ 

ಒಳಿತಿನ ಮರಗಳ ಕೊಂಬೆಗಳು

ಹಿಂದೆ ಸೇರಿಕೊಂಡು 

ಹಗಲಿನ ಬಿಸಿಲಿನುರಿಯಲ್ಲಿ 

ದಕ್ಕಿದ ನೆರಳನ್ನು ನೆನೆದು

ತಾನೇ ಹೊಗಳಿಕೊಂಡು

ಒಂದು ರಾತ್ರಿಗೆ ಬೆಲೆಕಟ್ಟುತ್ತಿದ್ದವು.

'ಚಾವಣಿಯ ಆಧಾರಸ್ತಂಭಕ್ಕೆ ಗೆದ್ದಲುಹಿಡಿದ

ಮನೆಯಂತೆ ಆಗಿಬಿಟ್ಟೆ ನೀನು'

ಎಂಬೆಲ್ಲಾ ಕನಿಕರದ ನುಡಿಗಳನ್ನು

ಸ್ತ್ರೀಶಕ್ತಿಸಂಘದ ಮಹಿಳೆಯರು 

ಚಹಾದೊಂದಿಗೆ ಸೇವಿಸುತ್ತಿದ್ದರು

ಗಂಡನಿಲ್ಲದವಳ ಸ್ವಾತಂತ್ರ್ಯ

ಬಲೆಗೆ ಸಿಲುಕಿದ ಹೆಣ್ಣು ಹರಿಣದಂತೆ

ಎಂದುಕೊಂಡು

ಗಂಡ ಸತ್ತವಳ ಮೊದಲ ಸ್ವಾತಂತ್ರ್ಯ ಸಮರಕ್ಕೆ ಸೇನಾನಿಯಾಗಿ ನಿಂತಳು.

*

ಮಲಯಾಳಂ ಮೂಲ- ವಿನೀತಾ ಬಿಜು

ಕನ್ನಡಕ್ಕೆ- ಕಾಜೂರು ಸತೀಶ್

ಹುಳು

'ನನ್ಹೆಸ್ರು ಹುಳು'

'ಹುಳುನಾ?'

ಎತ್ತರದ ದನಿಯಲ್ಲಿ ಕೇಳಿದರು ಟೀಚರ್

ತರಗತಿಯಲ್ಲಿ ಮಕ್ಕಳ ಜೋರು ನಗೆಬುಗ್ಗೆ.

'ಹ್ಮ್

ನನ್ಹೆಸ್ರು ಹುಳು ಅಂತ'

'ಓಹ್ ನಿಜ

ಹಾಜರಿ ಪುಸ್ತಕದಲ್ಲೂ ಅದೇ ಹೆಸರು;

ಹುಳು!'

'ಇದೆಂಥ ಹೆಸ್ರು

ಅದೆಂಥ ಅಪ್ಪ ಅಮ್ಮನೋ'

ಗೊಣಗಿದರು ಟೀಚರ್

'ಸರಿ ಪೆನ್ಸಿಲ್ ತೆಗಿ' ಟೀಚರ್ ಅಂದರು

ಹುಳು ತೆಗೆಯಲಿಲ್ಲ

'ಪುಸ್ತಕ ತೆಗಿ' ಎಂದರು

ಹುಳು ಹೊರತೆಗೆಯಲಿಲ್ಲ

ಬರೆಯಲು ಹೇಳಿದರು

ಹುಳು ಬರೆಯಲಿಲ್ಲ

ಹುಳು

ಆಕಾಶಕ್ಕೆ ಮರಗಳಿಗೆ

ಎಲೆಗಳಿಗೆ

ಎಲೆಗಳಿಂದ ಸುರಿವ ಬೆಳಕಿನೆಡೆಗೆ

ಕಣ್ಣುನೆಟ್ಟು ಕಿವಿ ತೆರೆದು ಬೆರಳ ಚಾಚಿ ಓದಿಕೊಂಡನು

'ಅಪ್ಪ ಅಮ್ಮನ ಕರ್ಕೊಂಡು ಬಾ'

ಮನೆಗೆ ಕಳಿಸಿದರು ಟೀಚರ್ 

ಮರುದಿನ ಬೆಳಿಗ್ಗೆ  ಬಂದನು ಹುಳು 

'ಅಪ್ಪ ಅಮ್ಮ ಎಲ್ಲಿ?'

'ಬರ್ತಾರೆ'

ಖಚಿತವಾಗಿ ನುಡಿದನು

ಮಧ್ಯಾಹ್ನದ ಬುತ್ತಿ ಬಿಚ್ಚಿದಾಗ

ಎರಡು ದೊಡ್ಡ 'ಚಿಟ್ಟೆ'ಗಳು

ನುಗ್ಗಿ ಬಂದವು ಆಫೀಸಿನೊಳಗೆ.

ಅವುಗಳ ರೆಕ್ಕೆಗಳು ರೇಷ್ಮೆಯ ವಸ್ತ್ರಗಳು

ಮಧ್ಯಾಹ್ನ ಮೆಲ್ಲನೆ ಕರಗಿಹೋಯಿತು

 'ನಾವು ಹುಳುವಿನ

ಅಪ್ಪ ಅಮ್ಮ'

ಚಿಟ್ಟೆಗಳೆಂದವು

'ನಾವು ಅವನನ್ನು 

ತುಂಬಾ ಪ್ರೀತಿಯಿಂದ ಸಾಕ್ತಿದ್ದೇವೆ

ಅವನು ಚುಂಬಿಸುತ್ತಲೇ

ಮಕರಂಧವನ್ನು ವರ್ಗಾಯಿಸಬಲ್ಲ

ಒಂದು ಸ್ಪರ್ಶದಿಂದ

ಎಲೆಗಳನ್ನು  ಮರಗಟ್ಟಿಸಬಲ್ಲ

ದೊಡ್ಡವನಾದ ಮೇಲೆ 

ಅವನಿಗೆ ಪ್ಯೂಪ ಎಂಬ ಹೆಸರಿಡುತ್ತೇವೆ

ಆಮೇಲೆ ಚಿಟ್ಟೆ ಎಂಬ ಹೆಸರಿಡುತ್ತೇವೆ'

'ಏನು ಹುಡುಕ್ತಿದ್ದೀಯಾ?'

ಮನೆಗೆ ತಲುಪಿ

ಬೀರುವಿನೊಳಗೆ ಹುಡುಕುತ್ತಿರುವುದನ್ನು ಗಮನಿಸಿ

ಗಂಡ ಕೇಳಿದ

'ನನ್ನ ರೆಕ್ಕೆಗಳನ್ನು'

 ಮೆಲ್ಲನೆ ನುಡಿದರು ಟೀಚರ್ 

*

ಮಲಯಾಳಂ ಮೂಲ- ಅರುಣ್ ಭಾಸ್ಕರ್ ಪಿ

ಕನ್ನಡಕ್ಕೆ- ಕಾಜೂರು ಸತೀಶ್

ಸಮುದ್ರ

''ಅತ್ಯಂತ ದೊಡ್ಡ ಸಮುದ್ರ ಯಾವುದು?'' ಶಿಕ್ಷಕರು ವಿದ್ಯಾರ್ಥಿಯನ್ನು ಕೇಳಿದರು.

ವಿದ್ಯಾರ್ಥಿಯು ಒಂದು ಕ್ಷಣ ಯೋಚಿಸುತ್ತಾ ನಿಂತಿದ್ದನ್ನು ಕಂಡು ಶಿಕ್ಷಕರೇ ಉತ್ತರ ಹೇಳಿದರು.

''ಅಲ್ಲ ಸರ್ ... ಅಶಾಂತವಾದ ಮನಸ್ಸೇ ಅತ್ಯಂತ ದೊಡ್ಡ ಸಮುದ್ರ'' ವಿದ್ಯಾರ್ಥಿ ಹೇಳಿದ.

ಶಿಕ್ಷಕರು ಒಂದು ಕ್ಷಣ ಕಣ್ಣು ಮುಚ್ಚಿ ನಿಂತು ತನ್ನೊಳಗೆ ಮುಳುಗಿದರು.

ತನ್ನ ಆಳದಿಂದ ಸಾಲು ಸಾಲು ಅಲೆಗಳೆದ್ದು ತಲೆಗೆ ಅಪ್ಪಳಿಸಿ ಸಾಯುತ್ತಿದ್ದವು.

ಮನಸ್ಸಿನ ತುಂಬೆಲ್ಲಾ ನೊರೆಗಳು- ಗುಳ್ಳೆಗಳು.

ಮತ್ತೆ ತಡ ಮಾಡಲಿಲ್ಲ.

 ವಿದ್ಯಾರ್ಥಿಯನ್ನು ತರಗತಿಯಿಂದ ಹೊರಗೆ ಹಾಕುವ ಬದಲು ಶಿಕ್ಷಕರೇ ತರಗತಿಯ ಹೊರಗೆ ಹೋಗಿ ನಿಂತರು.

*

ಮಲಯಾಳಂ ಮೂಲ -

 ಪಿ ಕೆ ಪಾರಕ್ಕಡವು 

ಕನ್ನಡಕ್ಕೆ - ಕಾಜೂರು ಸತೀಶ್

ಪಾದ

ಪಾದ ಆಗಿದ್ದಕ್ಕೇನೋ

ಸದಾ ತುಳಿಸಿಕೊಳ್ಳುತ್ತಿರುವುದು

ಇನ್ನು

ನಾನೊಂದು ಆಕಾಶವಾಗಬೇಕು

ನಕ್ಷತ್ರಗಳಷ್ಟೇ ಬಿರಿದು ಅರಳುವ

ಅಪಾರ ಕಾಯ

*

ಮಲಯಾಳಂ ಮೂಲ - ಲೂಯಿಸ್ ಪೀಟರ್ 

ಕನ್ನಡಕ್ಕೆ- ಕಾಜೂರು ಸತೀಶ್

ನೆರೆಮನೆ

ಬೆಳಕಾದಾಗ

ನೆರೆಮನೆ ಮಾಯವಾಗಿತ್ತು

ಏನಾಗಿರಬಹುದು

ಕುಂಞಾಲಿ ಕಾಕನಿಗೂ

ಆಮೀನ ಅತ್ತೆಗೂ

ಕುಂಞಾಮೀನಾಳಿಗೂ

ಅವರ ಅಂಗಳದ

ಮದರಂಗಿಯ ಬೇರುಗಳು

ನನ್ನ ಮನೆಯ ದಾಸವಾಳವನ್ನು

ಭಯದಿಂದ ನಡುಗುತ್ತಾ ಬಿಗಿದಪ್ಪಿದೆ

ಒಂದರಿಂದ ಹತ್ತರವರೆಗೆ

ಭಾರತವೇ ನಮ್ಮ ದೇಶವೆಂದು

ಒಟ್ಟಾಗಿ ಕಲೆತು ಕಲಿತ

ಕುಂಞಾಮೀನಾಳ ಕಣ್ಣುಗಳು

ನನ್ನ ಕಿಟಕಿಯ ಒಳಗೆ ತುಂಬಿ ತುಳುಕುತ್ತಿವೆ

ಒಂದೇ ಒಂದು ರಾತ್ರಿಯ ಕತ್ತಲಲ್ಲಿ

ಸಾವಿರ ಸಾವಿರ ಮನೆಗಳು ಮಾಯವಾಗಬಹುದು

ಕೋಟಿ ಜನ ಕಾಣೆಯಾಗಬಹುದು

ಆದರೆ ಒಂದು ಬೆಳಗು ಸಾಕು ನಮಗೆ

ಒಂದು ಬೆಳಕು ಸಾಕು..

*

ಮಲಯಾಳಂ ಮೂಲ - ಪವಿತ್ರನ್ ತೀಕ್ಕುನಿ

ಕನ್ನಡಕ್ಕೆ- ಕಾಜೂರು ಸತೀಶ್

ಪತ್ರ

'ಪ್ರೀತಿಪೂರ್ವಕವಾಗಿ'

ಎಂದಷ್ಟೇ ಬರೆದ ಪತ್ರವೊಂದು ಸಿಕ್ಕಿತು

ಬರೆದದ್ದು ಯಾರು?

ಎಲ್ಲಿಂದ ಬರೆದದ್ದು?

ಗೊತ್ತಿಲ್ಲ

ಬರೀ ಒಂದೇ ಒಂದು ಸಾಲಿನ ಪತ್ರ.

ಯಾರಿರಬಹುದೆಂದು ಯೋಚಿಸಿದೆ

ಎಷ್ಟು ಉದಾತ್ತ ಪ್ರೀತಿ

ಇಲ್ಲ ನೆನಪಾಗುತ್ತಿಲ್ಲ

ತಮಾಷೆಗೆ ಯಾರಾದ್ರೂ ಮಾಡಿರ್ಬಹುದು

ಗೆಳೆಯ ಹೇಳಿದ

ಯಾಕೋ ಆ ರಾತ್ರಿ

ನಿದ್ದೆಹತ್ತಲೇ ಇಲ್ಲ

ವಿದ್ಯುದ್ದೀಪದ ಸ್ವಿಚ್ ಆನ್ ಮಾಡಿದೆ

ಕಿಟಕಿ ತೆರೆದೆ

ಹೆಸರೇ ತಿಳಿಯದ ಹೂಗಳ

ಪರಿಮಳದೊಂದಿಗೆ

ಗಾಳಿ ಪ್ರವೇಶಿಸಿತು 

ಕೋಣೆಯಿಡೀ ಅದರದ್ದೇ ಓಡಾಟ 

ಪುಟ್ಟ ಮಕ್ಕಳಿಗೆ ಹೇಳುವಂತೆ 

ಬೀಳ್ಬೇಡ ಜೋಪಾನ ಎಂದು 

ಗಾಳಿಗೆ ಹೇಳಿದೆ

ಯಾಕೋ  ಎನೋ 

ಮನೆಗೆ ಕರೆಮಾಡಬೇಕೆನಿಸಿತು

ಏನಾಯ್ತು ಎಂದರು   ಗಾಬರಿಯಿಂದ 

ಏನೂ ಇಲ್ಲ ಸುಮ್ನೆ ಮಾಡಿದ್ದು

ಎಂದಷ್ಟೇ ಉತ್ತರಿಸಿ ಫೋನಿಟ್ಟೆ

ಮೇಜಿನ ಮೇಲಿದ್ದ

ಆ ಪತ್ರ ರೆಕ್ಕೆಬಿಡಿಸಿತು 

'ಪ್ರೀತಿಪೂರ್ವಕ' ಎಂಬ ಆ ಹಕ್ಕಿ

 ಹಾರುತ್ತಾ ಹಾರುತ್ತಾ

ನೇರ ಎದೆಗೇ ಇಳಿಯಿತು.

*

ಮಲಯಾಳಂ ಮೂಲ - ಹರೀಶ್ ಶಕ್ತಿಧರನ್

ಕನ್ನಡಕ್ಕೆ- ಕಾಜೂರು ಸತೀಶ್ 

ಸುರಿವ ಮಳೆಯಲ್ಲಿ

ಬಿಸಿಲಲ್ಲಿ

ಮಳೆಯಲ್ಲಿ

ಕೊಡೆಯಲ್ಲಿ

ನನ್ನೊಂದಿಗೆ ಹೆಜ್ಜೆಹಾಕಲು

ನಿನ್ನ ಕರೆದದ್ದು

ಬದಲಿಗೆ ಕೊಡೆ ಹಿಡಿಯಲಿಕ್ಕಲ್ಲ

ಹೂವಿನ ಪರಿಮಳ ಹೀರಿ

ಸುಖಿಸಲು ನಿನಗೆ ಹೇಳಿದ್ದು

ಹೂವನ್ನೇ ಕುಯ್ಯಲಿಕ್ಕಲ್ಲ

ಆದರೆ

ನೀನು ನನ್ನ ಕೊಡೆಯನ್ನೂ ಹೂವನ್ನೂ ತೆಗೆದು

ಬಿಸಿಲಲ್ಲಿ ಓಡಿದೆ

ಸುರಿವ ಮಳೆಯಲ್ಲಿ

ನಾನು ನನ್ನ ಕಣ್ಣುಗಳಲ್ಲಿ ಕಡಲಾಗಿ

ಸುಮ್ಮನೆ ನಿಂತುಬಿಟ್ಟೆ

*

ಮಲಯಾಳಂ ಮೂಲ- ಶಿಮ್ನ ಕೇರಳ ಕೆ ಪಿ

ಕನ್ನಡಕೆ - ಕಾಜೂರು ಸತೀಶ್

ದಾನ

ನನ್ನನ್ನು ತುಂಡು ತುಂಡಾಗಿ

ಹಂಚಿಬಿಡುತ್ತೇನೆ

ಮಕ್ಕಳಿಗಾಗಿ

ಗಂಡನಿಗಾಗಿ

ಮಿತ್ರರಿಗಾಗಿ

ಅಸಹಾಯಕರಿಗಾಗಿ

ಕಡೆಗೆ

ನನ್ನ ಕನ್ನಡಿಯಲ್ಲಿ 

ನನ್ನ ಕಣ್ಣುಗಳನ್ನಷ್ಟೇ ನೋಡುತ್ತೇನೆ

ಜೊತೆಗೆ ಕಣ್ಣೀರನ್ನೂ 

*

ಮಲಯಾಳಂ ಮೂಲ - ಮಾಧವಿಕುಟ್ಟಿ 

ಕನ್ನಡಕ್ಕೆ- ಕಾಜೂರು ಸತೀಶ್ 

ಯಮ

ಯಮ ಎದುರಿಗೆ ಬಂದು ನಿಂತಾಗ

ಅವಳು ಸೀರೆ ಉಡುತ್ತಿದ್ದಳು

ಪೂರ್ಣ ಉಟ್ಟೇ ಇರಲಿಲ್ಲ

ಸಾಕು ಸಾಕು

ಬಾ ಜೊತೆಗೆ

ಎಂದನು ಯಮ

ಅವಳು ಯಮನನ್ನೇ ನೋಡಿದಳು

ಚಿತ್ರದಲ್ಲಿ ಕಂಡಂತೆ ಇರಲಿಲ್ಲ

ಎಷ್ಟು ಚಂದ ಗೊತ್ತಾ

ಒಳ್ಳೆಯ ಎತ್ತರ

ಅದಕ್ಕೆ ಸರಿಯಾದ ತೂಕ

ಯಮ ಒಮ್ಮೆ ನಕ್ಕ

ಸಾಕು ಸಾಕು

ಬಾ ಜೊತೆಗೆ

ಸ್ವಲ್ಪ ಇರಿಯಪ್ಪ

ಸ್ವಲ್ಪ ಜಡೆ ಕಟ್ಕೋತೇನೆ..

ನಿಮ್ದು ಮದ್ವೆ ಆಗಿದ್ಯಾ?

ಯಾಕೆ?

ಸುಮ್ನೆ ಕೇಳ್ದೆ

ಆಗಿದೆ

ಹೆಂಡ್ತಿ ಅಂದ್ರೆ ಇಷ್ಟನಾ?

ಹೌದು

ಸಾಕು ಸಾಕು

ಬಾ ಜೊತೆಗೆ

ಈ ಬೊಟ್ಟು ಹಾಕೋತೇನೆ

ಕನ್ನಡಿಯಲ್ಲಿ ಅಂಟಿಸಿಟ್ಟ ಬೊಟ್ಟನ್ನು

ಹಣೆಗಿಟ್ಟಳು

ಇಷ್ಟು ಸಾಕು

ಬಾ ಜೊತೆಗೆ

ಯಮ ಅವಳ ಮುಖವನ್ನೊಮ್ಮೆ ನೋಡಿದ

ಅವಳ ಕಣ್ಣುಗಳು ತುಂಬಿದ್ದವು

ಯಮ ಅವಳ ಕಣ್ಣೀರು ಒರೆಸಿದ

ಅವಳನ್ನಾಲಂಗಿಸಿ

 ಹಣೆಗೆ ಮುತ್ತನ್ನಿಟ್ಟ

ಇಷ್ಟು ಪ್ರೀತಿಯಿಂದ

ಯಾರೂ ನೋಡಿಕೊಂಡಿರಲಿಲ್ಲ ನನ್ನನ್ನು 

ಮುದ್ದಿಸಿರಲಿಲ್ಲ 

ಯಮ ನಕ್ಕು ನುಡಿದ

ಅದಕ್ಕೇ ಎಲ್ಲರೂ ನನ್ನ ಹಿಂದೆ ಬರುವುದು

ಜಗದ ಎಲ್ಲವನ್ನೂ 

ಎಲ್ಲರನ್ನೂ ತೊರೆದು

ಅವಳು ಆ ಕೈಹಿಡಿದು ನಡೆದಳು

 ದೂರ ಬಹುದೂರ

*

ಮಲಯಾಳಂ ಮೂಲ -ನಯನಾ ವೈದೇಹಿ

ಕನ್ನಡಕ್ಕೆ- ಕಾಜೂರು ಸತೀಶ್

ಆಹಾ

ಒಂದಾನೊಂದು ಕಾಲದಲ್ಲಿ

ಒಂದು ಊರಿನಲ್ಲಿ

ಮನೆಗೆಲಸದ ನಡುವೆ

ಸೊಂಟ ಸರಿಪಡಿಸಿ

ದಣಿವಾರಿಸಿಕೊಳ್ಳುವುದರ ನಡುವೆ

ಹೆಂಡತಿ ಒಂದು ಕವಿತೆ ಬರೆದಳು

ಓದಿದವರೆಲ್ಲರೂ ''ಆಹಾ'' ಎಂದರು.

ಹೆಂಡತಿ ಮತ್ತೊಂದು ಕವಿತೆ ಬರೆದಳು

ಓದಿದ ಅವರೆಲ್ಲರೂ ಅಂದರು

"ಇವತ್ತು ಗಂಡಂದಲ್ವಾ ಅಡುಗೆ?''

ಆಹಾ!

ಹೆಂಡತಿ ಮತ್ತೆ ಕವಿತೆ ಬರೆದಳು

ಓದಿದವರೆಲ್ಲರೂ ಒಟ್ಟಾಗಿ ಅಂದರು

''ಇವತ್ತು ಪಾತ್ರೆ-ಪಗಡೆ ತೊಳಿಯೋ ಕೆಲಸ ಎಲ್ಲಾ

ಗಂಡಂದೇ ಅಲ್ವಾ?''

ಆಹ್ಹಾ!

ಹೆಂಡತಿ ಮತ್ತೆ ಕವಿತೆ ಬರೆದಳು

ಓದಿದವರಿಗೀಗ ಸಹಿಸಲಾಗುತ್ತಿಲ್ಲ

''ಮನೆಗೂಡಿಸೋದೆಲ್ಲ ಗಂಡನೇ ಅಲ್ವಾ?''

ಆಹ್ಹಾ!

ಹೆಂಡತಿ ಮತ್ತೆ ಕವಿತೆ ಬರೆದಳು 

ಓದಿದವರೆಲ್ಲ ತಿರಸ್ಕಾರದಿಂದ

''ಇವಳ ಗಂಡ ಅಮ್ಮಾವ್ರ ಗಂಡನೇ ಇರಬೇಕು''

ಆಹ್ಹಾ!

ಹೆಂಡತಿ ಮತ್ತೆ ಒಂದು ಕವಿತೆ ಬರೆದಳು

ಓದಿದವರು ಸೆಟೆದೆದ್ದರು

''ಇವಳ್ನೆಲ್ಲಾ  ನಿಯಂತ್ರಿಸದಿರೋದಕ್ಕೆ ಒಬ್ಬ ಸರಿಯಾದ ಗಂಡ್ಸು ಇಲ್ಲದಿರೋದೇ ಕಾರಣ''

ಆಹ್ಹಾ!

ಗಂಡ ಎಂದಿನಂತೆ

ಕವಿತೆ ಬರೆಯುತ್ತಿದ್ದಾನೆ

ಕಥೆ ಬರೆಯುತ್ತಿದ್ದಾನೆ

ಆತ್ಮರತಿಯಲ್ಲಿ ಮುಳುಗಿದ್ದಾನೆ

 ಓದಿದವರು ಅಹುದಹುದೆನ್ನುತ್ತಿದ್ದಾರೆ

' ಓರ್ವ ಯಶಸ್ವಿ ಪುರುಷನ ಹಿಂದೆ 

 ಒಳ್ಳೆಯ ಹೆಣ್ಣೊಬ್ಬಳಿರುತ್ತಾಳೆ'

ಗಂಡ ಮತ್ತೆ ಮತ್ತೆ ಬರೆಯುತ್ತಿದ್ದಾನೆ 

ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದಾರೆ

ಆಹಾ!

* 

ಮಲಯಾಳಂ ಮೂಲ - ವಿ ಕೆ ಶಾಹಿನ

ಕನ್ನಡಕ್ಕೆ- ಕಾಜೂರು ಸತೀಶ್

ಪ್ರೊಫೆಸರ್

ನನ್ನ ನೆನಪಿದ್ಯಾ ನಿಂಗೆ?

ನಾನು ಪ್ರೊಫೆಸರ್ ಸೇಠ್

ನಿಂಗೆ ಭೂಗೋಳಶಾಸ್ತ್ರ ಕಲಿಸ್ತಿದ್ದೆ

ಹ್ಮ್..ಆರಾಮ

ಈಗ ನಿವೃತ್ತಿ ಜೀವನ

ಆದ್ರೂ ಗಟ್ಟಿಮುಟ್ಟಿಯಾಗಿದ್ದೇನೆ ನೋಡು

ಹೆಂಡ್ತಿ ತೀರ್ಕೊಂಡ್ಳು

ಕೆಲವು ವರ್ಷಗಳಾದ್ವು

ದೇವ್ರ ದಯದಿಂದ ಎಲ್ಲಾ ಮಕ್ಳು ಒಂದು ಹಂತಕ್ಕೆ ಬಂದಿದ್ದಾರೆ

ಒಬ್ಬ ಸೇಲ್ಸ್ ಮ್ಯಾನೇಜರ್

ಮತ್ತೊಬ್ಬ ಬ್ಯಾಂಕ್ ಮ್ಯಾನೇಜರ್

ಇಬ್ರಿಗೂ ಕಾರಿದೆ

ಮೂರ್ನೇಯವ್ನು ಪರವಾಯಿಲ್ಲ

ಆದ್ರೆ ಹೇಳುವಷ್ಟೇನೂ ಇಲ್ಲ ಬಿಡು

ಇರ್ತಾರಲ್ವಾ ಎಲ್ಲರ ಮನೇಲೂ ಒಬ್ಬೊಬ್ರು -ಕಪ್ಪುಚುಕ್ಕೆ ಥರ

ಸರಳ ಮತ್ತು ತರಳ ಇಬ್ರಿಗೂ ಮದ್ವೆಯಾಯ್ತು

ಇಬ್ರಿಗೂ ಒಳ್ಳೆ ಗಂಡಂದಿರೇ ಸಿಕ್ಕಿದ್ರು

ನೀನು ನಂಬಲ್ಲ,  ನಂಗೀಗ ಹನ್ನೊಂದು ಮೊಮ್ಮಕ್ಳು!

ನಿಂಗೆ? ಮೂರು?

ಬಿಡು, ಫ್ಯಾಮಿಲಿ ಪ್ಲ್ಯಾನಿಂಗ್ ಕಾಲ ಅಲ್ವಾ?

ಛೆ! ಛೆ! ನಾನೇನು ಅದರ ವಿರುದ್ಧ ಅಲ್ಲ ಬಿಡು

ಕಾಲಕ್ಕೆ ತಕ್ಕ ಕೋಲ ಹಾಕ್ಬೇಕಲ್ವಾ?

ಜಗತ್ತೇ ಬದಲಾಗ್ತಿದೆ, ನಾವೂ ಬೆಳೀತಿದ್ವಿ ನೋಡು

ಹಳೇ ಮೌಲ್ಯವೆಲ್ಲಾ ಹೋಯ್ತು

ಈಗೇನಿದ್ರೂ ಹೊಸ ರೀತಿನೀತಿಗಳು

ಕಣ್ಮುಚ್ಚಿ ತೆಗೆಯುವಷ್ಟ್ರಲ್ಲಿ ಎಲ್ಲಾ ಬದಲಾಗಿರ್ತದೆ

ವಯಸ್ತಾಯ್ತಲ್ವಾ

ಹಿಂದಿನ ಹಾಗೆ ಸುತ್ತಾಡ್ಲಿಕ್ಕೆ ಆಗ್ತಿಲ್ಲ

ಸ್ವಲ್ಪ ಮೈಕೈ ನೋವು ಬಿಟ್ರೆ ಬೇರೆ ಎಲ್ಲಾ ಓಕೆ

ಶುಗರ್ ಇಲ್ಲ ಬಿಪಿ ಇಲ್ಲ ಹಾರ್ಟ್ ಅಟ್ಯಾಕ್ ಆಗಿಲ್ಲ

ಇದೆಲ್ಲಾ ಯಾಕೆ ಅಂದ್ರೆ ಆಗ ನನಗಿದ್ದ ಶಿಸ್ತುಬದ್ಧ ಜೀವನ ಶೈಲಿ

ನೀನು ಹೇಗಿದ್ದೀಯ ?

ಚೆನ್ನಾಗಿದ್ದೀಯ? ತುಂಬಾ ಸಂತೋಷ

ಈ ವರ್ಷ ನಂಗೆ ಅರವತ್ತೊಂಬತ್ತು ತುಂಬುತ್ತೆ

ಸೆಂಚುರಿ ಹೊಡೀಬೇಕು ಅಂದ್ಕೊಂಡಿದ್ದೀನಿ

ನೀನು ಆಗ ಕಡ್ಡಿ ಥರ ಒಣಗಿಹೋಗಿದ್ದೆ

ಈಗ ಊದ್ಬಿಟ್ಟಿದ್ದೀಯಲ್ವಪ್ಪ!

ಏಯ್.. ಸುಮ್ನೆ ತಮಾಷೆ ಮಾಡ್ದೆ ಆಯ್ತಾ

ಇನ್ನು ಈ ದಾರೀಲಿ ಬರುವಾಗ

ನಮ್ಮ ಮನೆಗೆ ಬರ್ಬೇಕು

ಆ ಮನೆ ಕಾಣ್ತಿದೆಯಲ್ವಾ

ಅದರ ಹಿಂದೆನೇ ನಮ್ಮನೆ.

*

ಇಂಗ್ಲಿಷ್ ಮೂಲ- ನಿಸ್ಸೀಮ್ ಎಜೆ಼ಕಿಯಲ್ 

ಕನ್ನಡಕ್ಕೆ- ಕಾಜೂರು ಸತೀಶ್ 

ಗೊಂಬೆ

ಹಾಲಿನ ಪರಿಮಳ ಹೊದ್ದ ಹಸುಳೆಯ ಭೋಗಿಸಿ ಎಸೆದ ಮೇಲೆ

ಮುದ್ದಾದ ಗೊಂಬೆಯೊಂದನ್ನು ಕೊಂಡು ಮನೆಗೆ ಮರಳಿದ.

*

ಮಲಯಾಳಂ ಮೂಲ- ಸಿನಿ ಪ್ರದೀಶ್

ಕನ್ನಡಕ್ಕೆ- ಕಾಜೂರು ಸತೀಶ್ 

ದೂರ

ವರುಷಗಳ ಅನಂತರ

ದಿವಾಕರ

ಅಪ್ಪನನ್ನು ನೋಡಲು

ವೃದ್ಧಾಶ್ರಮಕ್ಕೆ ತಲುಪಿದ

ಒಂದಿಷ್ಟೂ ಆಸಕ್ತಿ ತೋರದೆ

ದಿವಾಕರನ ಹೆಂಡತಿ

ಸಾಕುನಾಯಿ ಜಿಮ್ಮಿಯೊಡನೆ

ಕಾರಿನಲ್ಲೇ ಕುಳಿತಳು

ಜಿಮ್ಮಿಯನ್ನು ಕರ್ಕೊಂಡ್ಬರ್ಲಿಲ್ವಾ?

ಅಪ್ಪ ಕೇಳಿದರು

ಇಷ್ಟು ದೂರ ಬರುವಾಗ 

ಹೇಗಪ್ಪಾ ಅವ್ನನ್ನು

ಒಬ್ನೇ ಮನೇಲಿ ಬಿಟ್ಟು ಬರೋದು?

*

ಮಲಯಾಳಂ ಮೂಲ- ಸತೀಶನ್ ಮೋರಾಯಿ

ಕನ್ನಡಕ್ಕೆ- ಕಾಜೂರು ಸತೀಶ್ 

ನನ್ನ ಮಾತು

ನನ್ನ ಮಾತು

ಬಸ್ಸಿನ ಕಿಟಕಿಯ ಸೀಟು ಬಿಟ್ಟು

ಈಚೆಗೆ ಬಂದು ಕೂರುತ್ತದೆ

ಗಾಳಿಮಳೆಯಲ್ಲಿ ನೆನೆದ

ಹಾಡುಗಳನ್ನು ಆಸ್ವಾದಿಸದೆ

ಮರುದಿನದ ಮಧ್ಯಾಹ್ನದ ಊಟಕ್ಕೆ

ಮಕ್ಕಳಿಗೇನು ಸಾರು ಮಾಡಲೆಂದು

ಲೆಕ್ಕ ಹಾಕುತ್ತದೆ

ಬಸ್ಸಿಂದಿಳಿದು

ಹಾದಿಬದಿಯ ಚೆಲುವನ್ನು ಆಸ್ವಾದಿಸದೆ

ಬಹುಬೇಗ ಹಾದಿ ಸಾಗಲೆಂದು

ಬಿರಬಿರನೆ ಹೆಜ್ಜೆಯಿಟ್ಟು

ಬೆವರಲ್ಲಿ ಸ್ನಾನಮಾಡಿ ಮನೆಸೇರುತ್ತದೆ

ಕತ್ತಲಾಗುವ ಕುರುಹುಗಳನ್ನು

ಒಲೆಯಲ್ಲಿಟ್ಟು ಕುದಿಸುತ್ತದೆ

ಬೆಳುಬೆಳದಿಂಗಳು ಮನೆಯನ್ನಾವರಿಸುವ

ಬೆರಗನ್ನು ಅರಿತೂ ಅರಿಯದಂತೆ

ಬಟ್ಟೆಗಳ ಮಡಚಿಟ್ಟು

ಪಾತ್ರೆಗಳ ತೊಳೆದಿಟ್ಟು

ತಡವಾಗಿ ಮಲಗುತ್ತದೆ

ನುಸುಳುವ ಕನಸುಗಳನ್ನು

ಮುಲಾಜಿಲ್ಲದೆ ಹೊರಗೇ ನಿಲ್ಲಿಸುತ್ತದೆ

ನನ್ನ ಮಾತು

ಬೆಳಿಗ್ಗೆ ಬೇಗ ಎದ್ದು

ಕಲ್ಪನೆಗಳಲಿ ಮುಳುಗೇಳದೆ

ಕಾಫಿ ಕುಡಿದು

ಯಾರ ಗಮನಕ್ಕೂ ಬರದಂತೆ

ಮನೆಯ ಒಳಗೆ, ಹಿತ್ತಿಲಿನಲ್ಲಿ

ಬಾವಿಯಲ್ಲಿ ಅಲೆದು 'ತೀರು'ತ್ತದೆ.

*

ಮಲಯಾಳಂ ಮೂಲ- ರಗಿಲ ಸಜಿ

ಕನ್ನಡಕ್ಕೆ- ಕಾಜೂರು ಸತೀಶ್

ಎಲ್ಲವೂ ರಹಸ್ಯವಾಗಿಯೇ ಉಳಿದಿತ್ತು

ಅಪಾರ ಜನಸಂದಣಿಯಲ್ಲಿ

ಬೆರಳಿಗೆ ಬೆರಳು ಸೇರಿಸಿ ನಡೆದದ್ದು

ಡೈನಿಂಗ್ ಟೇಬಲಿನಲ್ಲಿ ಎದುರುಬದುರಾಗಿ ಕುಳಿತು

ಕಾಲಿಗೆ ಕಾಲು ತಾಗಿಸಿದ್ದು

ಸ್ಕೂಟರಿನ ಕನ್ನಡಿಯನ್ನು 

ನಿನಗೆ ನಾನು ನನಗೆ ನೀನು ಕಾಣುವ ಹಾಗೆ

ಜಾಣ್ಮೆಯಿಂದ ಹೊಂದಿಸಿ

ಹಿಂದೆ ಮುಂದೆ ರಸ್ತೆಯ ತುಂಬಾ ಸಾಗಿ

ಪರಸ್ಪರ ಮುಖನೋಡಿಕೊಂಡಿದ್ದು

ಹೆಸರನ್ನೇ ಬರೆಯದ ಉಡುಗೊರೆಗಳಿಗೆ

ಪ್ರೀತಿಯ ಹೊದಿಕೆ ಹಾಕಿ ರವಾನಿಸಿದ್ದು

ಯಾರನ್ನೋ ನೋಡುತ್ತಿರುವ ಹಾಗೆ

ರೆಪ್ಪೆಗಳ ಮಿಟುಕಿಸದೆ

ಸನಿಹಕೆ ಬಂದು ಕಡಲ ತಡಿಯಲ್ಲಿ ನಿಂತದ್ದು

ಒಂದೇ ಅಲೆಯಲ್ಲಿ ಮಿಂದ

ನಮ್ಮಿಬ್ಬರ ನಿಶ್ವಾಸವನ್ನು ಪರಸ್ಪರ ಉಸಿರಾಡಿದ್ದು

ಎಲ್ಲವೂ ರಹಸ್ಯವಾಗಿಯೇ ಉಳಿದಿತ್ತು.

ನಮ್ಮಿಬ್ಬರ ಸ್ಕೂಟರುಗಳು

ಒಂದೇ ಲಾರಿಯ ಚಕ್ರಕ್ಕೆ ಸಿಲುಕಿ

ನರಳಾಡಿ ಸಾಯುವವರೆಗೆ

ಎಲ್ಲವೂ ರಹಸ್ಯವಾಗಿಯೇ ಉಳಿದಿತ್ತು.

*

ಮಲಯಾಳಂ ಮೂಲ- ರಗಿಲ ಸಜಿ

ಕನ್ನಡಕ್ಕೆ- ಕಾಜೂರು ಸತೀಶ್ 

ಪ್ರೇಯಸಿಯೂ ಮತ್ತು ಹೆಂಡತಿಯೂ

ಹೆಂಡತಿ ತೀರಿಕೊಂಡ ದಿನ

ಬೆಳ್ಳಂಬೆಳಿಗ್ಗೆಯೇ ಅವಳು ಕರೆಮಾಡಿದಳು

'ಯಾವಾಗ ಬರ್ತೀಯ?'

'ಬೆಳಿಗ್ಗೆ'- ಅವನೆಂದ.

ಮುಖ ತೊಳೆದು

ಇಸ್ತ್ರಿ ಮಾಡಿದ ಬಟ್ಟೆ ಹಾಕ್ಬೇಡ

ಶೇವ್ ಮಾಡ್ಬೇಡ

ಮನೆಯ ಹಿಂದೆ ಬ್ಲ್ಯಾಕ್ ಟೀ ಮಾಡ್ತಿರ್ತಾರೆ

ಒಂದ್ಕಪ್ಪು ಕುಡಿದ್ಬಿಡು

ತೀರ್ಕೊಂಡವಳು ಬರ್ತಾಳಾ ಅಂತ

ಅಂಗಳದಲ್ಲಿ ಕಾಯ್ಕೊಂಡಿರು-

ನೆನಪಿಸಿದಳು ಅವಳು.

ನಂಗೆ ಕರಿಕಾಫಿ ಇಷ್ಟವಿಲ್ಲ

ಸಾವಿನ ಮನೆಯಲ್ಲಿ 

ಹಾಲು ಯಾಕೆ ಬಳಸ್ಬಾರ್ದು- ಕುಪಿತನಾದ

ಇವತ್ತೊಂದಿನ ತಡಿ- ಅವಳೆಂದಳು

ಸುಮ್ಮನಾದ.

ಬೇಜಾರಾ? ಕೇಳಿದಳು

ಗೊತ್ತಿಲ್ಲ ಎಂದ

ಇವತ್ತು ಅಳೋದೇ ಇರ್ಬೇಡ

ಜನ ನೋಡ್ತಿರ್ತಾರೆ- ಅವಳೆಂದಳು

ಅಳು ಬರದೆ ಹೇಗೆ ಅಳೋದು- ಅವನೆಂದ

ಹಳೆಯದೇನಾದ್ರೂ ನೆನಪಿಸ್ಕೊ

ಸುಡುಬೇಸಿಗೆಯ ಬಾವಿಯ ಹಾಗೆ

ಮಾತಲ್ಲಿ ನೋಟದಲ್ಲಿ

ಆಳದ ಪ್ರೀತಿಯನ್ನೆಲ್ಲ ಹೊರತೆಗೆದು 

ಬತ್ತುವ ಮೊದಲಿನ ಕಾಲದ ಏನನ್ನಾದರೂ ನೆನಪಿಸ್ಕೊ

ಏನೂ ನೆನಪಾಗಲಿಲ್ಲ

ನೀರಲ್ಲದ್ದಿದ ಬಣ್ಣಗಳಂತೆ

ಬೆರೆತುಹೋದವು ಒಂದರೊಳಗೊಂದು

ಏನಾದ್ರೂ ಸಿಕ್ಕೇ ಸಿಗುತ್ತೆ  ಯೋಚಿಸ್ತಿರು-

ಅವಳ ಸಲಹೆ

ಮದುವೆ ಸೀರೆ 

ಕಡುಹಸಿರು ಬಣ್ಣದ್ದೇ ಬೇಕೆಂದೂ

ಕುಪ್ಪಸದಲ್ಲಿ ನಕ್ಷತ್ರಾಕಾರದ 

ಸ್ವರ್ಣವರ್ಣದ ಚುಕ್ಕಿಗಳಿರಬೇಕೆಂದೂ

ಬರೆದ ಪತ್ರಗಳ ಭೂತಕಾಲದೊಳಗಿಣುಕಿ ನೆನೆದ

ಚಿಂತಿಸಿದ

ಕಡುಹಸಿರಿನ ಬದಲಿಗೆ

ಕಡುಗೆಂಪು ಸೀರೆಯ ಕೊಟ್ಟ

ನಕ್ಷತ್ರಗಳ ಬದಲು ಖಾಲಿ ಕುಪ್ಪಸ

ಅವಳ ನೋಯಿಸಿದೆನೆಂದು ಯೋಚಿಸಿದ

ಇನ್ನು ಅದೆಲ್ಲಾ ಅಸಾಧ್ಯವೆಂದು ನೆನೆದು

ನಿಜಕ್ಕೂ ದುಃಖಿಸಿದ.

ಯೋಚಿಸುತ್ತಲೇ ಇದ್ದ

ಅವಳಿಗೆ ನೀಡಲಾಗದ್ದು

ಅವಳಿಂದ ಪಡೆಯಲಾಗದ್ದು..

ಲೆಕ್ಕವಿಲ್ಲ.

ತಪ್ಪಿತಸ್ಥನ ಭಾವ ಮೂಡಿ

ಕಣ್ಣು ತುಂಬಿ ಕೆಂಪಗಾಗುತ್ತದೆಂದು

ನೆನಪಿಸಿದಳು ಫೋನಿನಲ್ಲಿ.

ನಾನೂ ಬರುತ್ತಿರುವೆ

ಅವಳನ್ನು ಮೊದಲು ಮತ್ತು ಕಡೆಯ ಬಾರಿ ನೋಡಲು

ನೀನು- ತೀರಿಕೊಂಡ ಅವಳ ಬಳಿ

ದುಃಖಿತನಾಗಿರುವುದ ನೋಡಿ

ನನ್ನ ಕಣ್ಣುಗಳು ತುಂಬುತ್ತವೆ

ಕಪ್ಪು ಗೆರೆಗಳುಳ್ಳ ಸೀರೆಯ ಸೆರಗ ತುದಿಯಲ್ಲಿ

ಬಾಯ್ಮುಚ್ಚಿ ಅಳು ನಿಲ್ಲಿಸುತ್ತೇನೆ

ಅವಳ ಮೇಲಿನ ಪ್ರೀತಿಯಿಂದಲ್ಲ

ಅವಳ ನೆನೆನೆನೆದು ಅಳುವ ನಿನ್ನ ಕಂಡು-

ಅವಳೆಂದಳು ಫೋನಿನಲ್ಲಿ.

*

ಮಲಯಾಳಂ ಮೂಲ- ಜಿಸಾ ಜೋಸ್

ಕನ್ನಡಕ್ಕೆ- ಕಾಜೂರು ಸತೀಶ್

ಮಳೆಬಿಲ್ಲು

The Rainbow

  - Christina Rossetti

Boats sail in the rivers,

And ships sail on the seas;

But clouds that sail across the sky

Are prettier far than these.

There are bridges on the rivers,

As pretty as you please;

But the bow that bridges heaven,

And overtops the trees,

And builds a road from earth to sky,

Is prettier far than these.

 ಮಳೆಬಿಲ್ಲು

ದೋಣಿ ಸಾಗಿದೆ ನದಿಯ ನಾದಕೆ

ಹಡಗು ಸಾಗಿದೆ ಕಡಲ ಲಾಲಿಗೆ

ಇದಕೂ ಸುಂದರ ಗಗನ ಗಾನಕೆ  ಮೋಡದ ಸಾಲು

ಸೇತುವೆಗಳಿವೆ ನದಿಯ ಚೆಲುವಿಗೆ

ಎಷ್ಟು ಸುಂದರ ನರನ ಕಾಣಿಕೆ

ಆದರಿದೋ  ಮಳೆಯಬಿಲ್ಲು

ಸಪ್ತ ವರ್ಣದ ಕಾಮನಬಿಲ್ಲು 

ಸ್ವರ್ಗಕ್ಕೆ ಸೇತುವೆ ಕಟ್ಟಿ 

ಜಗಕೆ ಮುಡಿಸಿದೆ ಬೆರಗ ದೃಷ್ಟಿ 

ಮರದ ಮೇರೆಯ ಮೀರಿಮೀರಿ

ಭೂಮಿ-ಬಾನಿಗೆ ಮಾಡಿ ದಾರಿ 

 ಸಹಜ ಸೃಷ್ಟಿಯ ಚೆಲುವ ಗೆಲುವಿದು ಸುಂದರ ಅತಿ ಸುಂದರ

*

ಇಂಗ್ಲಿಷ್ ಮೂಲ- ಕ್ರಿಸ್ಟೀನಾ ರೊಸೆಟಿ

ಕನ್ನಡಕ್ಕೆ- ಕಾಜೂರು ಸತೀಶ್ 

ಇರುವೆಗಳು

ಇರುವೆಗಳು

ತಲೆಗೂದಲ ತುಂಬ

ಸಾಲು ಸಾಲಾಗಿ ಕಣ್ಣರೆಪ್ಪೆಯ ಮೇಲೆ

ಇರುವೆಗಳು

ಕಣ್ಣೊಳಗಿಳಿಯುತ್ತವೆ

ಕೆನ್ನೆಗಳ ಕಚ್ಚಿ ತೂಗಾಡುತ್ತವೆ

ಮೂಗಿನ ಹೊಳ್ಳೆಗಳೊಳಗೆ

ಕಿವಿಗಳ ಒಳಗೆ

ಗುಂಪುಗುಂಪಾಗಿ ನುಗ್ಗುತ್ತವೆ

ತುಟಿಗಳ ಕಿತ್ತು ತಿನ್ನುತ್ತವೆ

ರೋಮಗಳಲ್ಲೆಲ್ಲ ಇರುವೆಗಳು

ರೋಮದ ಪೊದೆಗಳಲ್ಲೆಲ್ಲ ಇರುವೆಗಳು

ಬಗೆಬಗೆಯ ಇರುವೆಗಳು 

ಕಚ್ಚುವ ಇರುವೆ

ಮೈಯ್ಯ ಮೇಲೆಲ್ಲಾ ಓಡಾಡುವ ಇರುವೆ

ಮುಂಭಾಗದಿಂದ ಕಚ್ಚುವ ಇರುವೆ

ಹಿಂಭಾಗದಿಂದ ಕಚ್ಚುವ ಇರುವೆ

ಕಾಲುಗಳ ಮೇಲೆ ಹತ್ತಿ

ಕಾಲುಗಳನ್ನಾವರಿಸುವ ಇರುವೆ

ಅಸಹಾಯಕತೆಯಲ್ಲೊಮ್ಮೆ ಕೊಡವಲು ಯತ್ನಿಸಿದೆ

ಕೆಡವಲು ಯತ್ನಿಸಿದೆ

ನೆಲದ ತುಂಬೆಲ್ಲಾ ಹೊರಳಾಡಿದೆ

ಕಿತ್ತೆಸೆದೆ

ತಲೆ ಕೆರೆದುಕೊಂಡೆ

ಕೂದಲ ಕತ್ತರಿಸಿದೆ

ಕಣ್ಣರೆಪ್ಪೆಗಳ ಸುಟ್ಟೆ

ಕಣ್ಣಲ್ಲಿ ಸೀಮೆಎಣ್ಣೆ ಸುರಿದೆ

ತುಟಿಗಳ ಕಚ್ಚಿ ತುಂಡರಿಸಿದೆ

ಆದರೂ

ಇರುವೆಗಳು...

ಹಾಸಿಗೆಯ ಮೇಲೆ

ಹೊದಪಿನ ಒಳಗೆ

ತಲೆದಿಂಬಿನ ಒಳಗೆ

ಮಂಚದ ಕೆಳಗೆ

ಹುತ್ತದಂಥ ಕೆಂಪು ಇರುವೆಗಳು 

ನಿರ್ಭಿಡೆಯಿಂದ

ಬಟ್ಟೆ ಬಿಚ್ಚಿ ಕೊಡವಿದೆ

ಇರುವೆಗಳನ್ನೆಲ್ಲ

ಗುಡಿಸಿ ಹೊರಕ್ಕೆಸೆದೆ

ಇರುವೆಗಳೀಗ ಸಾಗುತ್ತಿವೆ

ನನ್ನ ಕೋಣೆಗಳ ಸುತ್ತ

ಸಾಲುಸಾಲಾಗಿ ಮೂಸುತ್ತಾ..

*

ಮಲಯಾಳಂ ಮೂಲ - ವಿದ್ಯಾ ಪೂವಂಚೇರಿ

ಕನ್ನಡಕ್ಕೆ- ಕಾಜೂರು ಸತೀಶ್