ಕಣ್ಣು ತುಂಬಿರುವಾಗ..

ಕಣ್ಣು ತುಂಬಿರುವಾಗ

ಯೋಚನೆಯ ಮಳೆಯೇಕೆ?

ಕೂಡಿಟ್ಟ ಕನಸುಗಳು

ಮುಳುಗದಿರದೇ?

ಎದೆಯ ತಳಪಾಯಗಳು

ಮಿಡಿದು ಮಿದುವಾದಾಗ 

ಸುಖದ ಗೋಡೆಯ ಕನಸು 

ಕುಸಿಯದಿರದೇ?

ನಗೆಯ ಹಾಳೆಯ ದೋಣಿ 

ಆಸೆಯಲಿ ನೆನೆದಾಗ 

ಗೀಚಿಟ್ಟ ನಾಳೆಗಳು 

ಮಸುಕಾಗದೇ?

ಈ ಕ್ಷಣದ ಉಸಿರೇ... 

ಮರೆತುಬಿಡು ನಾಳೆಗಳ 

ಈ ಕ್ಷಣದ ಹಸಿವೇ.. 

ತೊರೆದುಬಿಡು ನಾಳೆಗಳ...

ಕಣ್ಣು ತುಂಬಿರುವಾಗ 

ಯೋಚನೆಯ ಮಳೆಯೇಕೆ?

ಕೂಡಿಟ್ಟ ಕನಸುಗಳು 

ಮುಳುಗದಿರದೇ?

*

✍️ ಕಾಜೂರು ಸತೀಶ್ 

ಮುಖವಾಡ

ಜಗತ್ತಿನ ಮೂಲೆ ಮೂಲೆಗೂ ಅದೃಶ್ಯವಾದ ಕ್ಯಾಮೆರಾಗಳನ್ನು ಅಳವಡಿಸಲಾಯಿತು. ಮನುಷ್ಯನ ಎಲ್ಲಾ ವರ್ತನೆಗಳನ್ನು, ಆಗುಹೋಗುಗಳನ್ನು ಅವು ದಾಖಲಿಸತೊಡಗಿದವು.

ಅಂದಿನಿಂದ 'ಒಳ್ಳೆಯವರು' ಎಂಬ ಮುಖವಾಡ ಹೆಚ್ಚು ಹೆಚ್ಚು ಮಾರಾಟವಾಗತೊಡಗಿತು. ಜನ ಬದಲಾದರು. ಎಲ್ಲವನ್ನೂ ಯೋಚಿಸಿ ಆಡಿದರು, ಮಾಡಿದರು.

ನಾಯಿ ಮಾತ್ರ ಎಂದಿನಂತೆ ಬೊಗಳುತ್ತಿತ್ತು.

*

✍️ ಕಾಜೂರು ಸತೀಶ್