ವಿಕ್ರಾಂತ್ ಕೇಳ್ಕರ್ ಅವರು ಸೃಜನಶೀಲ ಶಿಕ್ಷಕರು. ಮಾಹಿತಿ ತಂತ್ರಜ್ಞಾನದ ಹಲವು ಶಾಖೆಗಳನ್ನು ಸ್ಪರ್ಶಿಸಿದ ಅನುಭವವಿರುವವರು. ಆ ಕ್ಷೇತ್ರದಲ್ಲಿ ರಾಷ್ಟ್ರೀಯ ಪುರಸ್ಕಾರವನ್ನು ಪಡೆದವರು. ಫೋಟೋಗ್ರಫಿಯಲ್ಲೂ ಆಸಕ್ತಿಯನ್ನು ಹೊಂದಿರುವ ಅವರು ಹಲವಾರು ಸೊಗಸಾದ ಪಕ್ಷಿಗಳ ಚಿತ್ರಗಳನ್ನು ಕ್ಲಿಕಿಸಿದ್ದಾರೆ. ಇಂಗ್ಲಿಷ್ ಭಾಷಾ ಶಿಕ್ಷಕರಾಗಿ ತಂತ್ರಜ್ಞಾನವನ್ನು ಅನುಕೂಲಿಸುವಿಕೆಯ ಭಾಗವಾಗಿಸಿಕೊಂಡಿದ್ದಾರೆ.
ಹೀಗೆ ಸಕ್ರಿಯರಾಗಿರುವ ವಿಕ್ರಾಂತ್ ಕೇಳ್ಕರ್ ಅವರು ನಮ್ಮೆದುರಿಗೆ ಪ್ರತ್ಯಕ್ಷವಾಗಿದ್ದು ಸತ್ ಛಾಯಾ ಎಂಬ ಕವನ ಸಂಕಲನದೊಂದಿಗೆ. ಅದರೊಂದಿಗೆ ಅವರು ಕವಿತೆ ಬರೆಯುತ್ತಾರೆ ಎಂಬ ಸಂಗತಿಯೂ ನಮಗೆ ತಿಳಿಯಿತು! ಅವರು ಅದನ್ನು ಸಾಹಿತ್ಯ ಶಿಶುವಿನ ಗೀಚು ಸಾಹಿತ್ಯ ಎಂದು ಮುಖಪುಟದಲ್ಲೇ ಬರೆದುಕೊಂಡಿದ್ದಾರೆ. ಅಂತ್ಯಪ್ರಾಸವುಳ್ಳ ರಚನೆಗಳಿವು. ಅವರ ಕವಿತೆಗಳ ಮಾದರಿ ಹೀಗಿದೆ:
ಸಾಹಿತಿಯು ನಾನಲ್ಲ ಸಾಧುವೂ ಅಲ್ಲ
ಕವಿಯಂತೂ ನಾನಲ್ಲವೇ ಅಲ್ಲ
ಛಂದಾಲಂಕಾರಗಳು ಎನಗೆ ತಿಳಿದಿಲ್ಲ
ಆದರೂ ಗೀಚುವ ದಾಹ ತೀರಿಲ್ಲ
ಪ್ರತಿಕ್ರಿಯಾತ್ಮಕ ಮಾದರಿಯ ಕವಿತೆಗಳಿವು.ಈ ಕೃತಿಗೆ ತಾ.ಶ್ರೀ.ಗುರುರಾಜ್, ಸದಾಶಿವ ಸೊರಟೂರು ಮುಂತಾದ ಲೇಖಕರ ಅಮೂಲ್ಯವಾದ ಮುನ್ನುಡಿಗಳಿವೆ. ಕನ್ನಡದ/ಜಗತ್ತಿನ ಹಲವು ಕಾವ್ಯಧಾರೆಗಳಿಗೆ ಮುಖಾಮುಖಿಯಾಗುತ್ತಾ ವಿಕ್ರಾಂತ್ ಸರ್ ಅವರು ಹೆಚ್ಚು ಹೆಚ್ಚು ಬರೆಯುವಂತಾಗಲಿ.
ಅವರಿಗೆ ಶುಭಾಶಯಗಳು.
*
ಕಾಜೂರು ಸತೀಶ್
