ഉദ്യാനപാലക൯

അഞ്ചാറ് പൂ പറിച്ചതിനു ശേഷം
ഇന്നു മകളുടെ ജന്മദിനം എന്നോർത്തു ഉദ്യാനപാലക൯.

സ്നേഹംകൊണ്ടു ആറാമത്തെ പൂ പറിച്ച് മകള്‍ക്കെന്നു കീശയിലിട്ടു

പിറ്റേദിവസം തുണി അലക്കും മുമ്പ് കീശയിൽ തപ്പുമ്പോൾ
അവള്ക്കത് കിട്ടി.
*

കന്നഡ കവിത - ജയന്ത് കായ്കിണി

പരിഭാഷ - കാജൂരു സതീശ്

ആരുടേത്?

പോള്ളുന്ന പാതകളിൽ
പാദങ്ങൾ പതിയുന്നു.
അമർന്ന ഒരു പാദത്തിന്നടിയിലായ
ഇടം ആരുടേത്?
ഇനിയൊരു പാദം  കാറ്റിൽ...
എങ്കിലും എനിക്കതിനെക്കുറിച്ച്
വേവലാതിയില്ല
കാറ്റിനു
വേലി കെട്ടാനാരും പഠിച്ചിട്ടില്ല.
*

കന്നട കവിത - കാജൂരു സതീശ്


പരിഭാഷ- സുനീതാ കുശാലനഗര

ബസൂ കവിതകൾ

കക്കൂസ്ക്കുഴിയില്‍ വീണ മനുഷ്യന്‍
മരിച്ചുപോയ ദിവസം
മുഖ്യമന്ത്രിയുടെ കോട്ട്
അത്തറും തേടി നടന്നു.
* *
എന്ത് ചെയ്യാന്‍ പറ്റും
എന്‍റെ മുറ്റം ഇത്രയല്ലേയുള്ളു;
നീ വരികയാണെങ്കില്‍
എന്‍റെ കാല്‍പ്പാടില്‍ തന്നെ
ചവിട്ടി വരണം.
* *

എന്നെപോലെ നിനക്കും
ഈ ലോകം 'സുന്ദര'മെന്നു കണ്ടാല്‍
വേറൊന്നുമില്ല
എനിക്കുള്ള അന്ധത നിനക്കുമുണ്ട്.
* *
വീശിയെറിഞ്ഞ കല്ല്
ചികഞ്ഞു തിന്നുന്ന കോഴിയുടെ കാലില്‍ കൊണ്ടു;
ഞൊണ്ടുന്ന കോഴി
കല്ലെറിഞ്ഞവന്‍റെ മുറ്റത്ത്
ഒരു മുട്ടയിട്ടു പോയി.
* *

കന്നട കവിത - ബസൂ

വിവ൪ത്തനം  - കാജൂരു സതീശ്