ಪತ್ರ

'ಪ್ರೀತಿಪೂರ್ವಕವಾಗಿ'

ಎಂದಷ್ಟೇ ಬರೆದ ಪತ್ರವೊಂದು ಸಿಕ್ಕಿತು

ಬರೆದದ್ದು ಯಾರು?

ಎಲ್ಲಿಂದ ಬರೆದದ್ದು?

ಗೊತ್ತಿಲ್ಲ

ಬರೀ ಒಂದೇ ಒಂದು ಸಾಲಿನ ಪತ್ರ.

ಯಾರಿರಬಹುದೆಂದು ಯೋಚಿಸಿದೆ

ಎಷ್ಟು ಉದಾತ್ತ ಪ್ರೀತಿ

ಇಲ್ಲ ನೆನಪಾಗುತ್ತಿಲ್ಲ

ತಮಾಷೆಗೆ ಯಾರಾದ್ರೂ ಮಾಡಿರ್ಬಹುದು

ಗೆಳೆಯ ಹೇಳಿದ

ಯಾಕೋ ಆ ರಾತ್ರಿ

ನಿದ್ದೆಹತ್ತಲೇ ಇಲ್ಲ

ವಿದ್ಯುದ್ದೀಪದ ಸ್ವಿಚ್ ಆನ್ ಮಾಡಿದೆ

ಕಿಟಕಿ ತೆರೆದೆ

ಹೆಸರೇ ತಿಳಿಯದ ಹೂಗಳ

ಪರಿಮಳದೊಂದಿಗೆ

ಗಾಳಿ ಪ್ರವೇಶಿಸಿತು 

ಕೋಣೆಯಿಡೀ ಅದರದ್ದೇ ಓಡಾಟ 

ಪುಟ್ಟ ಮಕ್ಕಳಿಗೆ ಹೇಳುವಂತೆ 

ಬೀಳ್ಬೇಡ ಜೋಪಾನ ಎಂದು 

ಗಾಳಿಗೆ ಹೇಳಿದೆ

ಯಾಕೋ  ಎನೋ 

ಮನೆಗೆ ಕರೆಮಾಡಬೇಕೆನಿಸಿತು

ಏನಾಯ್ತು ಎಂದರು   ಗಾಬರಿಯಿಂದ 

ಏನೂ ಇಲ್ಲ ಸುಮ್ನೆ ಮಾಡಿದ್ದು

ಎಂದಷ್ಟೇ ಉತ್ತರಿಸಿ ಫೋನಿಟ್ಟೆ

ಮೇಜಿನ ಮೇಲಿದ್ದ

ಆ ಪತ್ರ ರೆಕ್ಕೆಬಿಡಿಸಿತು 

'ಪ್ರೀತಿಪೂರ್ವಕ' ಎಂಬ ಆ ಹಕ್ಕಿ

 ಹಾರುತ್ತಾ ಹಾರುತ್ತಾ

ನೇರ ಎದೆಗೇ ಇಳಿಯಿತು.

*

ಮಲಯಾಳಂ ಮೂಲ - ಹರೀಶ್ ಶಕ್ತಿಧರನ್

ಕನ್ನಡಕ್ಕೆ- ಕಾಜೂರು ಸತೀಶ್