ನೆರೆಮನೆ

ಬೆಳಕಾದಾಗ

ನೆರೆಮನೆ ಮಾಯವಾಗಿತ್ತು

ಏನಾಗಿರಬಹುದು

ಕುಂಞಾಲಿ ಕಾಕನಿಗೂ

ಆಮೀನ ಅತ್ತೆಗೂ

ಕುಂಞಾಮೀನಾಳಿಗೂ

ಅವರ ಅಂಗಳದ

ಮದರಂಗಿಯ ಬೇರುಗಳು

ನನ್ನ ಮನೆಯ ದಾಸವಾಳವನ್ನು

ಭಯದಿಂದ ನಡುಗುತ್ತಾ ಬಿಗಿದಪ್ಪಿದೆ

ಒಂದರಿಂದ ಹತ್ತರವರೆಗೆ

ಭಾರತವೇ ನಮ್ಮ ದೇಶವೆಂದು

ಒಟ್ಟಾಗಿ ಕಲೆತು ಕಲಿತ

ಕುಂಞಾಮೀನಾಳ ಕಣ್ಣುಗಳು

ನನ್ನ ಕಿಟಕಿಯ ಒಳಗೆ ತುಂಬಿ ತುಳುಕುತ್ತಿವೆ

ಒಂದೇ ಒಂದು ರಾತ್ರಿಯ ಕತ್ತಲಲ್ಲಿ

ಸಾವಿರ ಸಾವಿರ ಮನೆಗಳು ಮಾಯವಾಗಬಹುದು

ಕೋಟಿ ಜನ ಕಾಣೆಯಾಗಬಹುದು

ಆದರೆ ಒಂದು ಬೆಳಗು ಸಾಕು ನಮಗೆ

ಒಂದು ಬೆಳಕು ಸಾಕು..

*

ಮಲಯಾಳಂ ಮೂಲ - ಪವಿತ್ರನ್ ತೀಕ್ಕುನಿ

ಕನ್ನಡಕ್ಕೆ- ಕಾಜೂರು ಸತೀಶ್