ಬಿ.ಪಿ.ಎಲ್.

ಬೆಟ್ಟದ ಹಚ್ಚ ಹಸಿರ ಹುಲ್ಲು ಹಾಸಲ್ಲೊಬ್ಬಳು ತಾಯಿ.
ಪಾಪ, ಒಂಟಿ ಜೀವ.

ಒಂದು ದಿನ
ಅವಳನ್ನು ನೋಡಲೆಂದು
ನದಿ ದಾಟಿ ಹೊರಟೆ.

ಅವಳು
ಕಾಮಾಲೆಯಂಥ ಬಿರುಬಿಸಿಲ ಕೋಲು ಮುರಿದು
ಉತ್ತರದ ಇಳಿಜಾರಿನ
ತೆಳ್ಳಗಿನ, ಬೆಳ್ಳಗಿನ
ಮೋಡಗಳೆಂಬೊ ಮೇಕೆಗಳನ್ನು ಓಡಿಸುತ್ತಿದ್ದಳು.

ನನ್ನ ನೋಡಿದ್ದೇ ತಡ
'ಬೆಟ್ಟ ಹತ್ತಿ ಬಂದ ನನ್ನ ಮುದ್ದು ಮಗುವೇ,
ತಲೆಬಿಸಿ ಕಡಿಮೆ ಮಾಡ್ಲಿಕ್ಕೆ ಏನಾದ್ರೂ ಮಾಡ್ಬೇಕಲ್ಲಾ'
ಎನ್ನುತ್ತಾ
ದಕ್ಷಿಣದ ಇಳಿಜಾರಿನಿಂದಿಳಿದು
ಕಪ್ಪು ಮೋಡಗಳ ಹಾಲು ಕರೆದು ಬಂದಳು.

ಮೋಡದ ಹಾಲಲ್ಲಿ
ಮಸ್ತಕಾಭಿಷೇಕ ನಡೆಸಿದೆ.
ಇಲ್ಲದ ರೇಷನ್ ಕಾರ್ಡಿನಲ್ಲಿ
ಕಣ್ಣೀರು ಸುರಿಸುತ್ತಾ ಅವಳೆಂದಳು:
'ಫಲವತ್ತಾದ ಭೂಮಿಯಲ್ಲಿದ್ದೇನೆ ನಾನು
ನಿನಗೇನಾದ್ರೂ ಮಾಡ್ಲಿಕ್ಕೆ ಸಾಧ್ಯಾನಾ?'
*

ಮಲಯಾಳಂ ಮೂಲ- ಪ್ರಕಾಶನ್ ಮಡಿಕೈ

ಕನ್ನಡಕ್ಕೆ- ಕಾಜೂರು ಸತೀಶ್