ಮಧ್ಯವಯಸ್ಸಿನಲ್ಲಿ ಕವಿತೆ ಬರೆದದ್ದು

ಎರಡು ದಶಕಗಳ ದೀರ್ಘ ಅಂತರದ ನಂತರ
ನೆನ್ನೆ ಸಂಜೆ
ನಾನೊಂದು ಕವಿತೆ ಬರೆಯಲು ಕುಳಿತೆ.
ಎರಡನೇ ಸಾಲು ತಲುಪುವಷ್ಟರಲ್ಲಿ
ಉತ್ಪ್ರೇಕ್ಷೆಯ ಏರುದಾರಿಯಲ್ಲಿ ಎಡವಿ
ಜೋರಾಗಿ ಬಿದ್ದುಬಿಟ್ಟೆ.

ಗೆಳೆಯರು ನನ್ನನ್ನು ಸೇರಿಸಿದ್ದು
ವ್ಯಾಕರಣದ ಸರ್ಕಾರಿ ಆಸ್ಪತ್ರೆಗೆ.

ಎಷ್ಟೊಂದು ಕಾಯಿಲೆಗಳು!
ಪ್ರೀತಿಗೆ ಕಾಮಾಲೆ
ಕ್ರಾಂತಿಗೆ ರಕ್ತದೊತ್ತಡ
ಆತ್ಮವಿಶ್ವಾಸಕ್ಕೆ ಬೊಜ್ಜು
ಕನಸಿಗೆ ಖಿನ್ನತೆ.

ವ್ಯಾಯಾಮ ಕಡ್ಡಾಯ ಪ್ರತೀ ದಿನ.

ಹಾಗಾಗಿ
ಗದ್ದೆ ಉತ್ತು
ಹೂದೋಟದಲ್ಲಿ ಅಗೆದು
ಭತ್ತದ ಹೊರೆ ಹೊತ್ತು
ತೆಂಗಿನ ಮರ ಹತ್ತಿ
ಬೆವರಲ್ಲಿ ಸ್ನಾನ ಮಾಡಿದ ನನ್ನ ಕವಿತೆ
ಪ್ರತೀ ದಿನ ಬೆಳ್ಳಂಬೆಳಿಗ್ಗೆ
ಟ್ರ್ಯಾಕ್ ಸ್ಯೂಟ್ ಹಾಕಿ
ಜಾಗಿಂಗ್ ಹೊರಡುತ್ತದೆ.
*

ಮಲಯಾಳಂ ಮೂಲ- ನಿರಂಜನ್ ಟಿ.ಜಿ.

ಕನ್ನಡಕ್ಕೆ- ಕಾಜೂರು ಸತೀಶ್