ಅಜ್ಜಿ ನಡೆಯುತ್ತಿದ್ದಾಳೆ

ಕಣ್ಮುಚ್ಚಿ ಮಲಗಿರುವ ಈ ಬೀದಿಯಲಿ ನಡೆಯುತ್ತಿದ್ದಾಳೆ ಅಜ್ಜಿ

ಮುಪ್ಪು ಬಂದಿದೆ ಅವಳು ಎಳೆದು ಸಾಗುತ್ತಿರುವ ಕಾಲಕ್ಕೆ

ತುಸು ಹೆಚ್ಚೇ ಆಗಿದೆ ಕಾಣದ ಅದರ ಭಾರ, ಬಾಗಿದೆ ಬೆನ್ನು

ಹಿಂದೆ ಬಹಳ ಹಿಂದೆ ಬಳುಕುವ ಅವಳ ನಡುವ ಹಿಂಬಾಲಿಸುತ್ತಿದ್ದ ಪಿಳಿಪಿಳಿ ಕಣ್ಣ ರೆಪ್ಪೆಗಳು

ಬಿಳಿಯಾಗಿವೆ, ಕುಡಿನೋಟವೂ...

ತರಗುಡುವ ಕೈ ಸೃಷ್ಟಿಸುತಿದೆ ಅವಳು ಉಸಿರಾಡುವಷ್ಟು ಗಾಳಿಯನ್ನು

ಅವಳ ಚರುಮದ ಮೇಲೆ ಹಕ್ಕುಸ್ವಾಮ್ಯ ಸಾಧಿಸಿದ ಸೂರ್ಯ

ಸಿದ್ಧನಾಗಿದ್ದಾನೆ ತಪ್ಪಿದರೆ ದಾವೆ ಹೂಡಲು

ಅವಳ ಒಡೆದ ಹಿಮ್ಮಡಿಯ ಒಳಗೆ ಸಿಲುಕಿದ ಮಣ್ಣಕಣದೊಳಗೆ

ಯಾವುದೋ ಕಾಲದ ಯಾರೋ ಒಬ್ಬ ಮನುಷ್ಯನ ಮೈಸುಟ್ಟ ಪಸೆಯಿದೆ

ಭೂಮಿ ಕೈಚಾಚುತಿದೆ ‘ಯವ್ವಾ’ ಎನುತ ದಣಿವಾರಿಸಿಕೊಳುವ ಗಳಿಗೆಯಲಿ

ಅಪ್ಪುಗೆಗಾಗಿಯೋ ಏನೋ ಅವಳು ಬಾಗಿದ್ದಾಳೆ

ಅಜ್ಜಿ ಎಳೆದೊಯ್ಯುತಲಿರುವ ಅವಳಿಗಿಂತಲೂ ಮುದಿಯಾದ ಕಾಲ

ಮಗುವಿನಂತೆ ಹಿಂಬಾಲಿಸುತಿದೆ ಅವಳ.

*

-ಕಾಜೂರು ಸತೀಶ್