ಪ್ರಿಯತಮ

ಹೆಣ್ಣಿಗೆ ಸದಾ ಒಬ್ಬ ಪ್ರಿಯತಮನಾದರೂ ಇರಬೇಕು

ಮನೆಗೆಲಸದ ಪ್ರಳಯಜಲದೊಳಗೆ

ಮುಳುಗಿ ಸಾಯುತ್ತಿರುವಾಗಲೂ

ನಿನ್ನನ್ನು ಸಾಯಲು ಬಿಡುವುದಿಲ್ಲವೆಂದು

ಹೊರಗೆಳೆದು ಎದೆಗಪ್ಪಿಕೊಳ್ಳಲು

ಮಕ್ಕಳ ಬುತ್ತಿ ಕಟ್ಟಿಡಲಿಲ್ಲ

ಸಮವಸ್ತ್ರ ಇಸ್ತ್ರಿ ಮಾಡಿಡಲಿಲ್ಲ

ಮಧ್ಯಾಹ್ನದ ಊಟ ಇನ್ನೂ ಸಿದ್ಧವಾಗಲಿಲ್ಲ

ಎಂಬಿತ್ಯಾದಿ ತಕರಾರುಗಳ ಉರಿಯಲ್ಲಿ ಕಪ್ಪುಗಟ್ಟುವಾಗ

ನೀನೆಂದೆಂದೂ ಸುಂದರಿಯೇ ಎಂದು ಸಮಾಧಾನಿಸಲು

ಜ್ವರದಿಂದ ನಡುಗುತ್ತಿದ್ದರೂ

ಕಚೇರಿಗೆ ರಜೆಹಾಕಿದ್ದರೂ

ಕೆಲಸ ಮುಗಿಸಿದರಷ್ಟೆ ವಿಶ್ರಮಿಸುವವಳ ಅಸಹಾಯಕತೆಗೆ

ಪ್ರೀತಿಯೇ ಇಲ್ಲದ ತಂಗಾಳಿ ಬೀಸುವಾಗ

ಕುಶಲ ವಿಚಾರಿಸಿ

ಪ್ರೀತಿಯ ಬೆಚ್ಚನೆಯ ಹೊದಿಕೆ ಹಾಸಲು

'ನನ್ನ ಕಂದಾ' ಎಂದು

ಕಲ್ಪನೆಯಲ್ಲಾದರೂ ಮುದ್ದಿಸಲು

*

ಮಲಯಾಳಂ ಮೂಲ - ರಶ್ಮಿ ಎನ್. ಕೆ.

ಕನ್ನಡಕ್ಕೆ- ಕಾಜೂರು ಸತೀಶ್