ಮಾತ್ರೆ

ಜ್ವರ ಒಲೆ ಉರಿಸುತ್ತಿದೆಯೇ?
ಹೃದಯ ಶವಾಸನದಲ್ಲಿದೆಯೇ?
ಶ್ವಾಸಕೋಶ ಬಲೂನು ಊದುತ್ತಿದೆಯೇ?
ಮೂತ್ರಪಿಂಡ ವಿಚ್ಛೇದನೆ ಕೊಟ್ಟಿತೇ?
ಸಿಹಿ ಹೆಚ್ಚಿ ಹೆಜ್ಜೇನುಗಳು ದಾಳಿಯಿಟ್ಟವೇ?
ಕೀಲು ನೂಲು ಪೋಣಿಸಿ ಮೂಳೆಗಳ ಹೊಲಿಯುತ್ತಿದೆಯೇ?

ಮುಟ್ಟಿ ನೋಡಿದೆ-
ಪುಟ್ಟ ಮಾತ್ರೆ.
ತೆರೆದೇ ಇರುವ
ಪುಟ್ಟ ಬಾಯಿ.
ತಿನ್ನಬೇಕು ನೋವು
ಅಹೋರಾತ್ರಿ.
ಪಾಪ!

ಹೊಟ್ಟೆ ತುಂಬಿದ ಮೇಲೆ
ಅದರ ಗಡಿಯಾರದಾಕಾರದ
'ಟಿಕ್ ಟಿಕ್' ಮಾತಿನ ಮೂತಿಗೆ
ಲಕ್ವಾ ಹೊಡೆದು
ಉದರದೊಳಗಿಟ್ಟುಕೊಂಡು
ಅದರ ತಾಯಿಯಾದವರಿಗೆ
ದೀರ್ಘ ಕುಂಭಕ!

ಅಂದ ಹಾಗೆ
ನನ್ನ ಟೋಕನ್ ಸಂಖ್ಯೆಯನ್ನು ಮರೆತೇಬಿಟ್ಟೆ!
*


ಕಾಜೂರು ಸತೀಶ್