ಎರಡು ಸಾಲಿನ ಗಪದ್ಯ

ಮನೆಗೆ ಬೀಗ ಹಾಕುವಾಗ
ಜೇಬು ಮುಟ್ಟಿ ನೋಡಿಕೊಳ್ಳುತ್ತೇನೆ
ಪರ್ಸು, ಪೆನ್ನು, ಮೊಬೈಲು...
'ಹ್ಞಾಂ... ಇವೆ!'

'ಏನೋ ಮರೆತೆ' ಎಂಬ ವಸ್ತು
ಮಿದುಳ ತುದಿಯಲ್ಲೆಲ್ಲೋ
ಕೋಣೆಯ ಕಪಾಟಿನಲ್ಲೆಲ್ಲೋ
ಉಳಿಯದ ಹಾಗೆ
ಚೀಟಿಯಲ್ಲಿ ಎರಡು ಸಾಲುಗಳಾಗಿ ಹಡೆದು
ಮಡಿಸಿ ಜೇಬಲ್ಲಿಟ್ಟುಕೊಳ್ಳುತ್ತೇನೆ.

'ಈ ದೇಹ ಇಂದೇ ಮಣ್ಣಿಗೆ ಬಿದ್ದರೆ
ಹುಟ್ಟಲು ಬಿಡಿ'
ಎಂದರೆ ಪದ್ಯವಷ್ಟೇ ಆಗುತ್ತದೆ.
'ನಂಗೆ ಗದ್ದಲ ಅಂದ್ರೆ ಆಗಲ್ಲ
ಪದ್ಯದ್ಹಾಗೆ ಇದ್ದುಬಿಡಿ'
ಎಂದರೂ.

ಅದಕ್ಕೋಸ್ಕರವೇ ಎರಡು ಸಾಲು:
'ಈ ದೇಹವನ್ನು ಮೆಡಿಕಲ್ ಕಾಲೇಜಿಗೆ ಕೊಟ್ಟುಬಿಡಿ
ದಯವಿಟ್ಟು ಮನೆಗೆ ಒಯ್ಯದಿರಿ'.

(ನನ್ನ ಎಟಿಎಂ ಪಿನ್ - )

*

ಕಾಜೂರು ಸತೀಶ್