ಕ್ಯಾಲೆಂಡರ್ ಮಾರಾಟಕ್ಕಿದೆ

ದಶಕದಷ್ಟು ಹಳೆಯದು

ಅರ್ಧ ಶತಮಾನದಷ್ಟು ಹಳೆಯದು

ಶತಮಾನದಷ್ಟು ಹಳೆಯದು..

ಹೇ..

ಮನೆಬಿಟ್ಟು ಹೋಗಲಿಚ್ಛಿಸದವರೇ..

ಕಳೆದ ದಿನಗಳು

ಕಳೆದ ವರ್ಷಗಳು

ಕಳೆದ ದಶಕಗಳನ್ನೆಲ್ಲ

ಹಿಂತಿರುಗಿಸುವುದೀ ಕ್ಯಾಲೆಂಡರ್

ಬನ್ನಿ ಕೊಂಡುಹೋಗಿ.

ಜನ್ಮದಿನ

ಸತ್ತದಿನ

ಶ್ರಾದ್ಧದ ದಿನ

ಮರೆತುಹೋದ ದಿನ

ಅಮ್ಮ

ಅಪ್ಪ

ಹಠಾತ್ತನೆ ತೀರಿಕೊಂಡ ನಾಯಕರು

ಜಾತ್ರೆ

ಉರೂಸ್

ಸ್ವಾತಂತ್ರ್ಯ ದಿನ

ಯಾವುದೋ ಒತ್ತಡದಲ್ಲಿ ನೀವು ಮರೆತದ್ದು

ನಿಮ್ಮ ಮಕ್ಕಳಿಗೆ ತಿಳಿಯಲಿ

ಹಿಂದೆಯೊಬ್ಬ

ಅಪ್ಪನಿದ್ದ

ಹಿಂದೆಯೊಬ್ಬಳು

ಅಮ್ಮ ಇದ್ದಳು

ದೇಶವಿತ್ತು

ಸ್ವಾತಂತ್ರ್ಯ ದಿನವಿತ್ತು.

ಒಂದೇ ಒಂದು ಪಂಚೆಯಲ್ಲಿ ಬದುಕು ಕಳೆದ ನಾಯಕರು

ಬ್ಯಾಂಕ್ ಸಾಲ ಮಾಡಿ ತೀರಿಸಲಾಗದೆ ತೀರಿಕೊಂಡ ಪ್ರಧಾನಿ

ಕಡಲ ಕುದಿಸಿ ಉಪ್ಪನ್ನೇ ಎದೆಗಿಳಿಸಿಕೊಂಡವರು

ಕ್ಯಾಲೆಂಡರ್

ಎಲ್ಲ ಭಾಗಗಳಲ್ಲಿಯೂ

ಸಾಕ್ಷಿಯಾಗುತ್ತಿದೆ

ಮೌನದಲ್ಲೇ ಮಾತಿಗಿಳಿಯುತ್ತಿದೆ

ಆಗಸ್ಟ್ 15

ಜನವರಿ 26

ಮತ್ತು

ಮತ್ತೆಮತ್ತೆ ಜನವರಿ 30.

*

ಮಲಯಾಳಂ ಮೂಲ- ಟಿ ಸಿ ವಿ ಸತೀಶನ್

ಕನ್ನಡಕ್ಕೆ- ಕಾಜೂರು ಸತೀಶ್