ನನ್ನನ್ನು ಬೀಳ್ಕೊಡು ಮಗುವಿನಂಥವಳೇ
ನಿನ್ನೊಳಗಿನ ನನ್ನ ಸಣ್ಣತನಗಳ
ಪೊಟ್ಟಣದಲಿ ಕಟ್ಟಿಟ್ಟು
ಕೊಟ್ಟುಬಿಡು ನನಗೆ ನಿನ್ನ ಉಡುಗೊರೆಯಾಗಿ .
ತಪ್ಪಿರಬಹುದು ನಿನ್ನ ದಾರಿ ಕತ್ತಲು ಬೆಳೆದು
ನನ್ನ ನಿನ್ನ ನಡುವಿನ ಮಾತಲ್ಲಿ ನಗೆಯಲ್ಲಿ ಕನಸಲ್ಲಿ ಮುನಿಸಲ್ಲಿ
ನನ್ನ ದಾರಿಯ ನೆರಳ ನಿನ್ನ ಬೂಟುಗಾಲಲಿ ಅಳಿಸು
ಮತ್ತದರ ನೆನಪುಗಳನೂ..
ನನ್ನ ನಿಮಿತ್ತ ಬೆಳೆದ ನಿನ್ನ ನೋವುಗಳನ್ನು
ಬೇಯಿಸಿ ಬುತ್ತಿಯೊಳಗಿಟ್ಟು ಕಳಿಸಿಕೊಡು
ತಿನ್ನುತ್ತೇನೆ ಗಬಗಬನೆ ,ಇಂಗದ ಹಸಿವು ನನ್ನದು.
'ನೀನೆಂಬ ಏನೂ ಉಳಿದಿಲ್ಲ' ಎಂದೊಂದು ಷರಾ ಬರೆದು
ಬೀಳ್ಕೊಡು ನನ್ನನ್ನು ಮಗುವಿನಂಥವಳೇ..
*
ಕಾಜೂರು ಸತೀಶ್
No comments:
Post a Comment