ಕಾಡುಗವಿತೆಗಳು

'ಈ ಕಾಡು ಹಾದಿಯಲ್ಲಿ

ಇರುವೆಗಳೆರಡು ಮಾತನಾಡಿಕೊಂಡಂತೆ ಕವಿತೆ' ಎಂದುಕೊಂಡೆ

ಈಗೀಗ ಕಾಡು ಕಡಿದಿದ್ದಾರೆ ಜನ

ಹಾದಿಯಲ್ಲಿ ಆನೆಗಳಿವೆ.

*

ಸದ್ದಿಲ್ಲದೆ ಕಾಡು ಕಡಿಯುವ ಯಂತ್ರಗಳಿವೆ ಈಗ;

ಥೇಟ್ ಕವಿತೆ!

*

'ಕಾಡು ಅಂದ್ರೆ ಕವಿತೆ' ಎಂದೆ

ನಡುಹಗಲೇ ಗಂಧ ಕೊಯ್ದವರು ಈಗ ಕವಿಗೋಷ್ಠಿಗಳಲ್ಲಿ.

*

ಎಲೆ ಕಳಚಿ ಬಿತ್ತು ನನ್ನ ಕಿಸೆಗೆ

ಕವಿಗೋಷ್ಠಿಗೆ ಆಹ್ವಾನ ಎಂದುಕೊಂಡರೆ..

ಅಲ್ಲ. ಕವಿತೆ

*

ಆ ಮರದ ಟೊಂಗೆ ಮುರಿದು

ಈ ಮರದ ಮೇಲೆ ಮಲಗಿದೆ

ಈ ಮರ ಎಬ್ಬಿಸಿಲ್ಲ ಇನ್ನೂ ಅದನ್ನು,

ಅದರ ಸಾವನ್ನೂ.

*

ಕೈಗಳಿರದ ಕಾಡಿಗೆ

ಹುಳು ಹುಪ್ಪಟೆಗಳಿರುವಷ್ಟು ಕಾಲ

ಬೆನ್ನು ತುರಿಕೆಯ ಹಿಂಸೆಯಿಲ್ಲ.

*

'ಕುಹೂಽಽ' ಎಂದಿತು ಒಮ್ಮೆ

'ಕುಹೂ' ಎಂದಿತು ಮತ್ತೊಮ್ಮೆ

'ತಪ್ಪು' ಎಂದಿತು ಛಂದಸ್ಸು

ಅದೇನೂ ಹಾಡುವುದನ್ನು ನಿಲ್ಲಿಸಿಲ್ಲ!

*

ಕಾಜೂರು ಸತೀಶ್