ಮುತ್ತುಗ

ಮುತ್ತು ಬೆಳೆದಿದೆ ಮುತ್ತುಗ

ಬಿಸಿಲಿಗೆ ಮುತ್ತಿಕ್ಕಿ ತುಟಿಗೆಂಪು

*

ಬಿಸಿಲ ಒಡತಿ

ಬೆಂದಷ್ಟೂ ಕೆನ್ನೆಗೆಂಪು

*

ಅಷ್ಟು ದೂರದಲ್ಲೊಂದು ಮುತ್ತುಗ

ಕಾಡಿನ ಮೂಗುತಿಯ ಕೆಂಪು ಹರಳು

*

ಉರಿಬೇಸಿಗೆಯಲ್ಲಿ ಕಾಡು ನಕ್ಕಿತು

ಬಿಸಿಲ ಜಗಿದುಗುಳಿ ಕೇಸರಿ ನಾಲಗೆ

*

ಧರಿಸಿಕೊಳ್ಳಲೂ ಆಗದಿರುವಷ್ಟು ಬಿಸಿಲು

ಹಳದಿಗೆಂಪು ಬೆತ್ತಲ ಮೈ

*

ಕಾಡು ಎಲೆಗಳಚಿ ಕಪ್ಪಾಗುವ ಹೊತ್ತು

ಮುತ್ತುಗಕ್ಕೆ ಮೈನೆರೆದ ಪುಳಕ

*

ಬೇಯುವ ಬಿಸಿಲು

ಹಳದಿ ಕೇಸರಿ ಹಕ್ಕಿಗಳೆಲ್ಲ ಮುತ್ತುಗದ ಗೆಲ್ಲುಗಳಲ್ಲಿ.

*

ಕಾಜೂರು ಸತೀಶ್