ಖಡ್ಗದ ಹೂವು

ಯಾರೋ ಅಡಗಿಸಿಟ್ಟ

ಈ ಖಡ್ಗವ ಹಾಗೇ ಹಿಡಿದು ನಿಲ್ಲು

ಅದರ ಹೊಕ್ಕುಳ ಹೊಳಪಲ್ಲಿ

ಮುಖ ನೋಡಿಕೊಳ್ಳಬೇಕಿದೆ

ಸ್ವಲ್ಪ ಓರೆ

ಅದರ ಚೂಪು ತುದಿಯನ್ನಿತ್ತ ತಾ

ಹುಬ್ಬು ಕಣ್ರೆಪ್ಪೆಗಳ ತೀಡಿ

ಬಿಲ್ಲೊಂದ ಕಟ್ಟಬೇಕು ಸ್ವಯಂವರಕ್ಕೆ

ನೋಡು

ಕೋಗಿಲೆಯ ಹಾಡು

ದಾಟುತಿದೆ ಅದರ ಮೈಮುಟ್ಟಿಕೊಂಡೇ

ಹರಿತದಂಚಿನ ತುಟಿಯಲ್ಲಿ

ಗಾಯಗೊಳ್ಳದ ಇರುವೆಯ ನಡಿಗೆ

ಮುಖಕ್ಕೆ ಸವರು

ಯೌವ್ವನದ ಮೊಡವೆಯ ಮೋಡ ತಾಗಲು

ಕರಗಿ ನಿನ್ನ ಖಡ್ಗವ ಮೀಯಿಸಿ

ಕೆಂಪು ಹೂವಾಗಿಸುವುದು

ಕೊಡು ಈಗ

ಖಡ್ಗದ ಹೂವ

ನಿನಗೆ

ಮು

ಡಿ

ಸಿ

ಬಿ

ಡು

ವೆ.

*

ಕಾಜೂರು ಸತೀಶ್