ಆ ಅವನು
ಈ ಇವಳು
ಕೈ ತೋರಿದರೆ
ವಾಹನಗಳೂ ನಿಲ್ಲದೆ ಮುಂದೋಡುತ್ತಿದ್ದವು.
ಆ ಅವನು
ಈ ಇವಳು
ಚಂದ ಚಂದದ
ಬಟ್ಟೆ ತೊಡಲು ಕಲಿತರು.
ಆ ಅವನು
ಈ ಇವಳು
ಆ ಸಭೆಗಳಲ್ಲಿ
ಪ್ರಾರ್ಥನೆ ಮಾಡುವುದ ಕಲಿತರು.
ಆ ಅವನು
ಈ ಇವಳು
ಪ್ರಾರ್ಥನೆ ಮಾಡುತ್ತಾ
ಕೈಮುಗಿಯುವುದ ಕಲಿತರು.
ಕೈಮುಗಿಯುತ್ತಲೇ ನಡೆದರು
ಪರ್ಸಿಗೆ ಕೈಹಾಕಿ
ಪರಪರ ಎಣಿಸಿ ಕೊಟ್ಟರು
ಇವರು ಬಿದ್ದೇ ಹೋದರು.
ಅವರೀಗ ನಾಲಗೆಯಲ್ಲೇ ನಡೆವರು
ಕಾಲಿನಲ್ಲೇ ನುಡಿವರು
ಕೆಂಪಿನಲ್ಲೇ ಮೀಯ್ವರು
ಎದೆಯ ಮೇಲೇ ಕುಣಿವರು.
ಅವರ ಬಿಳಿ ಪಾದಗಳಲ್ಲೀಗ
ಇವರ ಕಪ್ಪು ತುಟಿಗಳು
ಇವರ ಹಣೆಯ ಖಾಲಿ ಸೈಟಿನಲ್ಲೀಗ
ಅವರ ಬೂಟುಗಾಲಿನ ಮನೆ
ಆ ಅವನು
ಈ ಇವಳು
ಕವಿತೆಗೂ ಕೈಮುಗಿಯುತ್ತಿದ್ದಾರೆ
ಪರ್ಸು ತೆಗೆದು ಎಣಿಸುತ್ತಿದ್ದಾರೆ ಪರಪರ.
*
ಕಾಜೂರು ಸತೀಶ್
No comments:
Post a Comment