ಬಸ್ಸು

ಬಸ್ಸು ಕೂಡ ನಮ್ಮೂರಿಗೆ ಬರುತ್ತೆ

ಉಸ್ಸಪ್ಪಾ ಅಂತ ಉಸ್ರು ಬಿಡುತ್ತೆ

ಆಚೆಗೊಂದ್ಸಲ ಈಚೆಗೊಂದ್ಸಲ ವಾಲುತ್ತೆ

ಮರ ಬಳ್ಳಿ ಹಾವನ್ನೆಲ್ಲ ಮುಟ್ಟುತ್ತೆ

ಜಿಗಣೆ ಕೂಡ ಟಿಕೇಟ್ ಇಲ್ದೆ ಬರುತ್ತೆ

ಹೊಟ್ಟೆ ತುಂಬಾ ರಕ್ತ ಕುಡ್ಕೊಂಡ್ ಹೋಗುತ್ತೆ

ಎದ್ರಿಗೆ ಬಂದ್ರೆ ಕಣ್ಕಣ್ ಹೊಡ್ಕೊಂಡ್ಹೋಗುತ್ತೆ

ಆದ್ರೂ ದೂರ ದೂರಾನೇ ಇರುತ್ತೆ

ಲಾಲಿ ಲಾಲಿ ಜೋಕಾಲಿ ಆಡ್ಸುತ್ತೆ

ಅಜ್ಜಂಗೂ ಕೂಡ ನಿದ್ದೆ ಬರ್ಸುತ್ತೆ

ಕೈ ತೋರ್ಸಿದ್ರೆ ನಾಚ್ಕೊಂಡು ನಿಲ್ಲುತ್ತೆ

‘ರೈಟ್ ರೈಟ್’ ಅಂದ್ರೆ ಮತ್ತೆ ಹೋಗುತ್ತೆ

ಬಸ್ಸು ಕೂಡ ನಮ್ಮೂರಿಗೆ ಬರುತ್ತೆ

ಜಾಸ್ತಿ ತಿಂದ ಹಾಗೆ ‘ಡರ್ಡರ್ರ್’ ಬಿಡುತ್ತೆ.

*

ಕಾಜೂರು ಸತೀಶ್