ಓಹ್! ಇದ್ದೀರಾ?!

ಒಂದೆರಡು ರಜೆ ಸಿಕ್ಕಿತೆಂದರೆ ಗೆಳೆಯ ಭರಮಪ್ಪ ಪಾಶಗಾರರಿಗೆ 'free ಇದ್ದೀರಾ?' ಅನ್ನೋ ಒಂದು ಮೆಸೇಜು ಕುಟ್ಟಿ ಎಸೆದುಬಿಡುತ್ತಿದ್ದೆ. ಅತ್ತಲಿಂದ 'yes' ಎಂಬ ಅವರ ಸಂದೇಶ ತಡಬಡಾಯಿಸಿಕೊಂಡು ಇನ್ನ್ಯಾವಾಗಲಾದರೂ ಬಂದು ಬಾಗಿಲು ತಟ್ಟಿದರೆ ಮರುದಿನ ಯಾವುದಾದರೂ ಬೆಟ್ಟಕ್ಕೆ ಹೋಗುವುದೋ ಅಥವಾ ಜಲಪಾತದ ಜೊತೆಗೂಡುವುದೋ ಅಥವಾ ಕೇರಳದ ಯಾವುದಾದರೂ ಒಂದು ಸ್ಥಳಕ್ಕೆ ಪಾದಸ್ಪರ್ಶಿಸಿ ಬರುವುದೋ ಆಲೋಚಿಸುತ್ತಾ ಕೂರುತ್ತಿದ್ದೆ.

ಒಂದೊಮ್ಮೆ 'No sir' ಎಂದು ಮೊಬೈಲು ಕುಂಯ್ಗುಟ್ಟಿದರೆ ಮುಚ್ಚಿದ ಮುಂಬಾಗಿಲಿಗೆ ಎರಡು ದಿನಗಳ ಪೂರ್ಣರಜೆಯನ್ನು ಕೊಟ್ಟು ಪುಸ್ತಕ-ಸಿನಿಮಾ-ಅಡುಗೆ-ಸಾಹಿತ್ಯ-ಸಂಗೀತ-ಚಿತ್ರಕಲೆಗೆ ಅಂಟಿಕೊಂಡುಬಿಡುತ್ತಿದ್ದೆ.
*

ಒಮ್ಮೆ ಮೂರು ದಿನಗಳ ರಜೆಯೊಳಗೆ ಕದವನ್ನೂ ತೆರೆಯದೆ ಕುಳಿತುಕೊಂಡಿದ್ದೆ. ಮೂರನೇ ದಿನ ಬಾಗಿಲು ಸದ್ದುಮಾಡಿತು.

ಬಾಗಿಲು ತೆರೆದರೆ ಎದುರಿಗಿರುವ ವ್ಯಕ್ತಿ -' ಓಹ್ ಇದ್ದೀರಾ ಮಾಷ್ಟ್ರೇ?! ಎರಡು ದಿನಗಳಿಂದ ಹೊರಗೇ ಕಾಣ್ಲಿಲ್ಲ? ಅದ್ಕೇ ನೋಡ್ಕೊಂಡು ಹೋಗೋಣ ಅಂತ ಬಂದೆ.. ಹಹ್ಹಹ್ಹಹ್ಹಾ' ಎಂದು ನಗುವನ್ನು ಮೊಗೆಮೊಗೆದು ಚೆಲ್ಲಿ ಹೊರಟುಹೋದರು.
*
ಅವರ ಕಲ್ಪನೆಯಲ್ಲಿ ನನ್ನ ಸಾವು ಹೇಗೆಲ್ಲಾ ಮೂಡಿರಬಹುದು ಎಂಬುದನ್ನು ಯೋಚಿಸಿ ಸಿಕ್ಕಾಪಟ್ಟೆ ನಗು ತುಂಬಿಕೊಂಡೆ!
*

ಕಾಜೂರು ಸತೀಶ್