ಮಳೆ

ಅವಳು ಸುರಿಯಲಾರಂಭಿಸಿದಳು.

'ನನ್ನ ಕಣ್ಣೀರೇ ಹೆಂಚಿನಿಂದ ತೊಟ್ಟಿಕ್ಕುತ್ತಿರುವುದು. ನನ್ನ ಏದುಸಿರೇ ಗಾಳಿಯಾಗಿ ಬೀಸುತ್ತಿರುವುದು. ನನ್ನ ರೋಷವೇ ಮಿಂಚು ಗುಡುಗುಗಳಾಗಿ ಕೇಳಿಸುತ್ತಿರುವುದು..'

ಅವಳ ಸುರಿಯುವ ಅಷ್ಟೂ ಮಾತುಗಳನ್ನು ಆಲಿಸಿ ತನಗೆ ತಾನೇ ಹೇಳಿಕೊಂಡ- 'ಇನ್ನು ಮಾಡಲಿಕ್ಕಿರುವುದು ಅದೊಂದೇ..'

ಆಮೇಲೆ ಅವನು ತನ್ನ ಮೈಯನ್ನು ಮಡಿಸಿ ಒಂದು ಕಾಗದದ ದೋಣಿಯಾಗಿಸಿ ಅವಳೊಳಗೆ ಹರಿಯಲಾರಂಭಿಸಿದ.
*

ಮಲಯಾಳಂ ಮೂಲ- ಪಿ.ಕೆ.ಪಾರಕ್ಕಡವು

ಕನ್ನಡಕ್ಕೆ- ಕಾಜೂರು ಸತೀಶ್

ದೇವರು ಭೂಮಿಗಿಳಿದರೆ

ಜಗದ ಅಷ್ಟೂ ದೇವರುಗಳು ಭೂಮಿಗಿಳಿದಾಗ
ಅವರ ಕೊರಳಪಟ್ಟಿ ಗುಡಿಸಲಿನ ಅಂಗೈನಲ್ಲಿರುತ್ತದೆ
ಅವರ ಪಾದರಕ್ಷೆ ಬಂಗಲೆಗಳ ನೆತ್ತಿಯ ಮೇಲಿರುತ್ತದೆ!
*
ಕಾಜೂರು ಸತೀಶ್