ದಾನ

ನನ್ನನ್ನು ತುಂಡು ತುಂಡಾಗಿ

ಹಂಚಿಬಿಡುತ್ತೇನೆ

ಮಕ್ಕಳಿಗಾಗಿ

ಗಂಡನಿಗಾಗಿ

ಮಿತ್ರರಿಗಾಗಿ

ಅಸಹಾಯಕರಿಗಾಗಿ

ಕಡೆಗೆ

ನನ್ನ ಕನ್ನಡಿಯಲ್ಲಿ 

ನನ್ನ ಕಣ್ಣುಗಳನ್ನಷ್ಟೇ ನೋಡುತ್ತೇನೆ

ಜೊತೆಗೆ ಕಣ್ಣೀರನ್ನೂ 

*

ಮಲಯಾಳಂ ಮೂಲ - ಮಾಧವಿಕುಟ್ಟಿ 

ಕನ್ನಡಕ್ಕೆ- ಕಾಜೂರು ಸತೀಶ್ 

ಮದುವೆ

ಅವನ ಮದುವೆಯ ದಿನ ಇವನು ಜ್ವರದಿಂದ ಮಲಗಿದ್ದ.
ಅಂದಿನಿಂದ ಅವನು ಮಾತುಬಿಟ್ಟ
*
ಗುಂಡು, ತುಂಡು ಇಲ್ಲವೆಂಬ ಸಿಟ್ಟಿನಲ್ಲಿ ಕವರಿಗೆ ಹಾಕಿದ್ದ ಒಂದು ನೋಟನ್ನು ಕಿಸೆಗೆ ಇಳಿಸಿದ
ಅದು ಬಾರಿನ ಡ್ರಾಯರ್ ಸೇರಿತು
*
ಕಾರಿನಲ್ಲಿ ಬಂದು ಹೋದರು
ಸಾವಿರ ಸಾವಿರ ಮೌಲ್ಯದ ಬಟ್ಟೆ
ಕೆಜಿಗಟ್ಟಲೆ ಬಣ್ಣ - ಆಭರಣ
ಸ್ವಲ್ಪ ಉಂಡರು ಬಿಟ್ಟುಹೋದರು

ಇದೇನು ಇಷ್ಟೊಂದು ಕಾಗೆಗಳು ಇಲ್ಲಿ
ಇಂದು ಯಾವ ಕಾಗೆಯ ಮದುವೆ?
*
ಮನೆಯನ್ನು ಮಾರಿ ಮದುವೆ ಮಾಡಿದ್ದರು
ಈ ಕುಣಿಕೆ ಕೂಡ ಬಾಡಿಗೆಯದ್ದೇ!
*
ಸೂರ್ಯ ಹೇಳುತ್ತಿತ್ತು
ಇವತ್ತು ಮುಖಗಳೇ ಕಾಣಿಸುತ್ತಿಲ್ಲ
ಯಾರ ಗುರುತೇ ಸಿಗುತ್ತಿಲ್ಲ!
*
ಇರುವ ಒಂದು ಚೈನನ್ನೂ ಅಡವಿಟ್ಟಾಗ
ನೆರೆಮನೆಯವರ ಚೈನು ರಿಂಗುಗಳಿಗ ಸರಳ ವಿವಾಹದ ಕನಸು ಕಮರಿತು
*
ಅವನು ಐನೂರು ಹಾಕಿದ್ದ
ಇವನು ಐನೂರಾ ಒಂದು

ಕೊಳೆ ತೊಳೆಯಲೂ ಅದು ಒಳ್ಳೆಯದಂತೆ!
*
ಅವರಿಬ್ಬರದು ರಿಜಿಸ್ಟರ್ ಮದುವೆ
ಅವರೂರ ಮನದಲ್ಲಿ ಅಮರ ಕೈದಿಗಳು
*

- ಕಾಜೂರು ಸತೀಶ್