ಸೇತುವೆ ಮತ್ತು ಬಸ್ಸು

ಬಸ್ಸು ಸೇತುವೆಯ ಮೇಲಿದ್ದಾಗ

ನದಿಯ ಮೈಗೆ ಮೈತಾಕಿಸಿ ಹರಿವ ಬಸ್ಸು

ಬಸ್ಸು ಸೇತುವೆಯಲ್ಲಿ ಚಲಿಸುವಾಗ

ನೆರಳ ಮೈತಾಕಿಸಿ ಪುಳಕಗೊಳ್ಳುವ ನದಿ

ಬಸ್ಸಿಗೂ ನದಿಯ ತಣ್ಣನೆಯ ಮೈಯ್ಯೆಂದರೆ ಪ್ರೀತಿ

ಅಲೆಯ ಉಬ್ಬುತಗ್ಗುಗಳಲ್ಲಿ ಈಜು ಕಲಿಯುವುದು ಕನಸ್ಸಲ್ಲಿ

ಬಸ್ಸಿಗೆ ಹರಿಯುವ

ನದಿಗೆ ಚಲಿಸುವ

ಬಸ್ಸಿಗೆ ತಣ್ಣಗಾಗುವ

ನದಿಗೆ ಬೆಚ್ಚಗಾಗುವ

ಕನಸು

ವಿರಹ

ಒಂದು ದಿನ

ಮನೆಬಿಟ್ಟು ಓಡಿಹೋದ ಪ್ರೇಮಿಯ ಹಾಗೆ

ದಾರಿತಪ್ಪಿದ ಬಸ್ಸು

ರಸ್ತೆಯಿಂದ ಹಾರಿ

ನದಿಯ ತೋಳಲ್ಲಿ ಬಂಧಿ

ನದಿಗೂ ಬಸ್ಸಿಗೂ

ತುಂಬುಪ್ರೀತಿ

ಸಾವಿನಂಥ ಪ್ರೀತಿ

ಸಾವಿನ ಜನನ.

*

ಕಾಜೂರು ಸತೀಶ್