ಒಂಟಿ

ಒಂಟಿಯಾಗಿರುವವರ ಕೋಣೆಯಲಿ

ಎಂದೋ ಮನೆ ತೊರೆದು ಹೋದವರ ಪರಿಮಳ

ಸುತ್ತ

ಗಸ್ತು ತಿರುಗುವವರು

ಬೇಟೆಯ ಹುಡುಕಿ ಅಲೆವವರು

ಸಾಲು ಸಾಲಾಗಿ ಸಾಗುವವರು

ಮೂಲೆ ಮುಡುಕುಗಳಲಿ ಬಲೆ ಹೆಣೆವವರು

ಕಿಟಕಿಯಾಚೆ

ತಿಳಿ ಗಾಢ ಹಸಿರು ಹಳದಿ.

ಬಣ್ಣಗಳ ಉನ್ಮಾದವನು

ಎಲೆಗಳಲಿ ಹಿಡಿದಿಡುತಿದೆ ಗಾಳಿ

ಮಣ್ಣ ತುಂಬ ನೆರಳ ಹಾಸು

ಒಂಟಿಯಾಗಿರುವವರ ಇಳಿಸಂಜೆಯಲಿ

ಜೊತೆಗಿವೆ ಪಟಪಟ ರೆಕ್ಕೆ ಬಡಿತಗಳು

ಹಚ್ಚ ಹಸಿರ ನೆನಪ ನಡುವೆ

ಸುರಿವ ಕೆಂಬಣ್ಣದ ಸೂರ್ಯಧಾರೆ

ಒಂಟಿಯಾಗಿರುವವರ ಒಳಗೆ

ರಕ್ತದಂತೆ ಹರಿವ ಕತ್ತಲು

ಇರುಳ ಇರಿದು ಬೆಳೆವ

ಒಂಟಿ ಚಂದಿರ.

*

ಮಲಯಾಳಂ ಮೂಲ- ಚಿತ್ರ ಕೆ ಪಿ

ಕನ್ನಡಕ್ಕೆ- ಕಾಜೂರು ಸತೀಶ್