ನೆರೆಮನೆಯವ

ಕಂಡರೆ ಸಾಕು

ಬೊಗಳಿ ಕಚ್ಚುವಂತೆ ಬರುತ್ತಿದ್ದ ನನ್ನ ನೆರೆಮನೆಯವ

ಒಂದು ದಿನ ಇದ್ದಕ್ಕಿದ್ದಂತೆ ಮನುಷ್ಯನಾಗಿಬಿಟ್ಟ

ಆಶ್ಚರ್ಯ! ಎಷ್ಟು ಯೋಚಿಸಿದರೂ ಅರ್ಥವಾಗಲಿಲ್ಲ ನನಗೆ.

ಕಚಗುಳಿಯಿಟ್ಟು ನಕ್ಕ, ನಗಿಸಿದ

ಮನೆಗೆ ಆಹ್ವಾನಿಸಿದ

ನನ್ನ ಮಕ್ಕಳ ಮುದ್ದಿಸಿದ

ಮನೆಯವಳ ಕ್ಷೇಮ ವಿಚಾರಿಸಿದ

ನನ್ನನ್ನಾವರಿಸಿದ

ಬದುಕು ಪ್ರೀತಿ

ಕಲೆ ವಾಣಿಜ್ಯ

ಕವಿತೆ ಹೋರಾಟ

ಸೂತ್ರ ಸಿದ್ಧಾಂತ...

ಅಳೆದು ತೂಗಿ

ಮುರಿದು ಕಟ್ಟಿ

ಮಾತನಾಡಿದ

ಆದರೆ,

ಒಂದು ಮಾತ್ರ ಹೇಳಲಿಲ್ಲ-

ನನ್ನ ನೋಡಿದಾಗಲೆಲ್ಲ

ಕುಂಯ್ಗುಟ್ಟಿ ಬಾಲ ಅಲ್ಲಾಡಿಸಿ

ಮೈಮೇಲೇರಿ ನೆಕ್ಕುತ್ತಿದ್ದ

ಅವನ ಸಾಕುನಾಯಿಗೆ ಏನಾಯಿತೆಂದು!

*

ಮಲಯಾಳಂ ಮೂಲ- ಪವಿತ್ರನ್ ತೀಕ್ಕುನಿ

ಕನ್ನಡಕ್ಕೆ - ಕಾಜೂರು ಸತೀಶ್