ಮಚ್ಚೆ

ಆ ಹುಡುಗಿಯ ಬಲಕೆನ್ನೆಯಲ್ಲೊಂದು ಮಚ್ಚೆಯಿತ್ತು.
ಬೆಟ್ಟದಾಚೆ ಗೇರುಮರಗಳ ನಡುವೆ ಅವಳ ಮನೆ.
ನನ್ನ ಮನೆಯ ಸಮೀಪದ ಓಣಿಯಲ್ಲಿ
ಅವಳು ನಡೆದುಹೋಗುವಾಗಲೆಲ್ಲ
ನೋಟದಲ್ಲೇ ಅವಳ ಮಚ್ಚೆಯನ್ನು ಅಳಿಸಿಹಾಕುತ್ತಿದ್ದೆ.


ಅವಳು ತಲೆಬಾಗಿಸಿ ನಡೆದುಹೋಗುತ್ತಿದ್ದಳು.


'ಅವಳೊಬ್ಬಳು ಮನೆಗೆಲಸದವನ ಮಗಳಲ್ಲವೇ?
ಗೆಳೆಯರೇ ಇಲ್ಲ ಅವಳಿಗೆ'-ಅಮ್ಮ ಹೇಳಿದಳು.
ಆಮೇಲೆ ಮರಗೆಲಸದವನೊಬ್ಬ ಅವಳನ್ನು ಮದುವೆಯಾದ.
ಅವಳಿಗೆ ಮಕ್ಕಳೂ ಆಗಿ ತುಂಬು ಸಂಸಾರ.


ಈಗ,ಅಲ್ಲಿ ಒಂದು ಗೇರುಮರವೂ ಕಾಣಸಿಗುವುದಿಲ್ಲ.


ನನ್ನ ಕವಿತೆಗೆ ಏನೋ ಕೊರತೆಯಿದೆ-
ಯಾರೋ ಹೇಳಿದರು.


ನಾನು ಕೇಳಿದೆ-
'ಒಂದು ದೊಡ್ಡ ಮಚ್ಚೆಯ ಕೊರತೆಯಲ್ಲವೇ?'
**



ಮಲಯಾಳಂ ಮೂಲ - ಎಸ್. ಜೋಸೆಫ್



ಕನ್ನಡಕ್ಕೆ -ಕಾಜೂರು ಸತೀಶ್