Monday, November 2, 2015

ರೊಟ್ಟಿ

-೧-
ರೊಟ್ಟಿ ತಟ್ಟುವ ಅವ್ವನಿಗೆ
ಹೆಬ್ಬೆಟ್ಟಿನ ಸಹಿ ಬಲು ಸುಲಭ

ಅವ್ವ ರೊಟ್ಟಿ ತಟ್ಟಿ
ಜ್ಯಾಮಿತಿಯ ವೃತ್ತಕ್ಕೆ ದ್ರೋಹ ಬಗೆಯುವುದಿಲ್ಲ

ನನ್ನ ಹೊಟ್ಟೆಗಿಳಿದ ರೊಟ್ಟಿ
ಅವಳ ಹೆಬ್ಬೆಟ್ಟು ಸಹಿಗಳ ಜೀರ್ಣಿಸಿ
ಕವಿತೆಗಳ ಜನನ

-೨-
ನಾ ತಟ್ಟುವ ರೊಟ್ಟಿ
ಭೂಪಟಗಳ ನೆನಪಿಸುವುದು
ನನ್ನ ನಾಯಿಗೆ ಕಿತ್ತು ಕೊಡುವಾಗಲೂ
ಗಡಿ ಉಲ್ಲಂಘನೆಯಾಗುವುದಿಲ್ಲ
ಯುದ್ಧ ಸಂಭವಿಸುವುದಿಲ್ಲ

-೩-
ಅವ್ವಂದಿರ ತಪ್ಪಾಗಿ ಅರ್ಥೈಸಿದ ಸೂರ್ಯ
ರೊಟ್ಟಿ ಸುಡುತ್ತಿದೆ ನೆಲದ ಕಾವಲಿಯಲ್ಲಿ
ನೇಗಿಲ ಸೌದೆ ಎಷ್ಟು ಚೆನ್ನಾಗಿ ಉರಿಯುತ್ತದೆ

ಅದು ತಿಂದುಳಿದು
ಇಟ್ಟ
ರೊಟ್ಟಿ
ಮರಗಟ್ಟಿ
ಮರುಭೂಮಿಗಳಾಗಿವೆ

ಕುಣಿಕೆಗಳ ಎಸೆದರೆ ಸೂರ್ಯ ಮುಟ್ಟಿಯೂ ನೋಡುತ್ತಿಲ್ಲ
ಸುಲಭಕ್ಕೆ ಸಿಗುವ ಗೆಲ್ಲುಗಳೂ ಸೌದೆಗಳಾಗುತ್ತಿಲ್ಲ

-೪-
ನರಿ ಹೊಂಚು ಹಾಕುತಿದೆ
ಕಾಗೆ ಇನ್ನೇನು ಹಾಡಲಿದೆ.
***

-ಕಾಜೂರು ಸತೀಶ್

No comments:

Post a Comment

ಅನ್ಯಾಯ

ಲೋಕ ನುಂಗಿದವನ ಕಾಲಡಿಗೆ ಒಂದು ಬಾಳೆಹಣ್ಣು ಕದ್ದು ಸಿಪ್ಪೆ ಎಸೆದವನ ಕೊರಳಿಗೆ ಒಂದು ಹಗ್ಗವನ್ನು ಅಂಟಿಸುವುದಾದರೆ ಆ ಹಗ್ಗ ನೇಯ್ದವನ ಬೆವರು ಅನ್ಯಾಯವಾಗಿ ಆತ್ಮಹತ್ಯೆ ಮಾ...