ಆಮೇಲೆ ?

ಒಂದು ಕಾಡು ಇತ್ತು
ಆಮೇಲೆ ?
ಒಂದು ಊರು ಇತ್ತು
ಆಮೇಲೆ ?
ನದಿ, ಕೆರೆ, ತೋಡುಗಳಿದ್ದವು
ಆಮೇಲೆ ?
ಕಾಡು, ನಾಡು, ನದಿ, ಕೆರೆ, ತೋಡುಗಳಿದ್ದವು

ಅಷ್ಟೆ !
*
ಮಲಯಾಳಂ ಮೂಲ- ಸೆಬಾಸ್ಟಿಯನ್

ಕನ್ನಡಕ್ಕೆ- ಕಾಜೂರು ಸತೀಶ್

ಮನಃಶಾಸ್ತ್ರಜ್ಞ

ಜನಜಂಗುಳಿಯಲ್ಲಿ ಎಷ್ಟು ಜನ ಹುಚ್ಚರಿದ್ದಾರೆಂದು ತಿಳಿಯಲು
ಒಂದು ದಾಸವಾಳವನ್ನು ಎತ್ತಿ ತೋರಿಸಿದ.

ಅದ ನೋಡಿದ ಕೆಲವರು ಬಿರುಸಾಗಿ ನಡೆದುಹೋದರು
ಕಣ್ಣೆತ್ತಿಯೂ ನೋಡಲಿಲ್ಲ ಕೆಲವರು.

ಕರಗತೊಡಗಿತು ಜನಜಂಗುಳಿ
ಉಳಿದದ್ದು ತಾನೊಬ್ಬನೇ.

ಮನುಷ್ಯರ ಕುರಿತು ನೆನೆನೆನೆದು
ಉಕ್ಕಿದ ನಗು ಬೆಳೆದು ಅಟ್ಟಹಾಸ.

ಎತ್ತಿ ಹಿಡಿದಿದ್ದ ಆ ಹೂವ ಕಿವಿಯ ಮೇಲಿಟ್ಟು
ಹುಡುಕಿ ಹೊರಟ
ಮತ್ತೊಂದು ನಗರಕ್ಕೆ
*
ಮಲಯಾಳಂ ಮೂಲ- ಸೆಬಾಸ್ಟಿಯನ್

ಕನ್ನಡಕ್ಕೆ- ಕಾಜೂರು ಸತೀಶ್