ದೇಹ ಮೀಮಾಂಸೆ

ಚರುಮದ ಒಳಗೆ ಕೊಬ್ಬು ತುಂಬಿ
ಮೈಯ್ಯು ತುಸು ಹೆಚ್ಚೇ ಗಾಳಿಯ ಜಾಗವನು ಅತಿಕ್ರಮಿಸಿಕೊಂಡಾಗ
ಪಟ ನೋಡಿದ ಹುಡುಗಿ ತಿರಸ್ಕರಿಸಿದ ಹಾಗೆ ಬದುಕು

ಚೆಲುವು ತುಂಬಿದ ಹುಡುಗಿ ಕಣ್ಣಿಗೆ ಬಿದ್ದಾಗ
ಹಾದಿಯಲಿದ್ದ ಗಂಡಸರು 'ಬೇಕು' ಎಂದರು, 'ಸುಂದರಿ' ಎಂದರು.
ಅವಳಿಗೆ ಸಂಧಿವಾತವಿತ್ತು, ನೋಯುತ್ತಿದ್ದಳು ನಡೆಯುವಾಗ.

ಮುಖದ ಕಲೆಗಳಲಿ ಬಣ್ಣಗಳು ತುಂಬಿ
ತುಟಿಯ ಕಪ್ಪು ಕೆಂಪಾಗಿ ಹರಡಿ
ಕ್ಯೂ ನಿಂತ ಸುಕ್ಕುಗಳ ಸಾಲು ಯಾರಿಗೂ ಕಾಣದು

ಸರದಿ ಬರುವ ಹೊತ್ತಿಗೆ ಬೆನ್ನುಹುರಿಗೆ ಉರಿ

ಉಬ್ಬುಗಳು ಬಂದಾಗ ನಿಧಾನ ಸಾಗಬೇಕು

ಬೇಡ ಸಪಾಟು ಬಣ್ಣಗಳು ಕಣ್ಣಿಗೆ 

ಕಣ್ಣು ಮಾಂಸದ ಮಾರುಕಟ್ಟೆ

* 

ಕಾಜೂರು ಸತೀಶ್