ಪ್ರೀತಿಯ ಮರವೇ
ತೋಳ ಚಾಚೀ ಜಗಕೆ
ಬಿಸಿಲ ಹಗೆಯ ಜಗಕೆ
ನೆರಳ ಹಾಸಿಗೆ ಹಾಸು
ಎಲೆಯಂತಿರುವೆ ನಾನು
ಓ ಎಲೆ ಮರವೇ
ಗಾಳಿಯೇ ಆಗಿ ಜೀವವೇ ಆಗಿ
ನಾಕ ನಾಸಿಕದ ಒಳಗೆಲ್ಲ ಸುಳಿವೆ||ಪ್ರೀತಿಯ ಮರವೇ||
ಹೂವಂತಿರುವೆ ನಾನು
ಓ ಎಲೆ ಗಿಡವೇ
ಎದೆಯ ಜೇನಿನ ಹನಿಯೇ ಆಗಿ
ಕಣ್ಣ ಬಣ್ಣದಲಿ ಅದ್ದುತಲಿರುವೆ||ಪ್ರೀತಿಯ ಮರವೇ||
ಹಣ್ಣಂತಿರುವೆ ನಾನು
ಓ ಎಲೆ ಮರವೇ
ಹಸಿವ ಉದರಕೆ ಅಮೃತವೇ ಆಗಿ
ಜೀವಜಾಲವನು ತಣಿಸುತಲಿರುವೆ
||ಪ್ರೀತಿಯ ಮರವೇ||
ಲತೆಯಂತಿರುವೆ ನಾನು
ಓ ಪ್ರಿಯ ಮರವೇ
ಅಂಗ ಸಂಗದಲಿ ಏಕವೇ ಆಗಿ
ಒಲವಿನ ನಡುವನು ಬಳಸುತಲಿರುವೆ || ಪ್ರೀತಿಯ ಮರವೇ||
ಬೇರಂತಿರುವೆ ನಾನು
ಓ ಪ್ರಿಯ ಮರವೇ
ಆಳದಾಳಕೆ ಇಳಿದು
ಪ್ರೀತಿಯ ಮೊಗೆವೆ||ಪ್ರೀತಿಯ ಮರವೇ||
*
ಕಾಜೂರು ಸತೀಶ್
No comments:
Post a Comment