ಮದುವೆ ಎಂಬ ಖಾಸಗಿ ವಿಚಾರವೂ ಮತ್ತು....

ನನ್ನ ಗೆಳತಿಯೊಬ್ಬರು ಮದುವೆಯಾದರು. ಮದುವೆಯ ಮಾರನೇ ದಿನ ನಮಗೆ ವಿಷಯ ತಿಳಿಯಿತು. ಹಲವರು ನನ್ನನ್ನು ಕೇಳಿದರು- 'ಹೌದಾ?'!

ಮದುವೆ ಎನ್ನುವುದು ತೀರಾ ಖಾಸಗಿ ವಿಷಯ. ಹಾಗಾಗಿ ಯಾರನ್ನೂ ಆಮಂತ್ರಿಸದೆ ಅವರು ಮದುವೆಯಾದದ್ದು ಸರಿಯಾದ ನಿರ್ಧಾರ. ಅದಕ್ಕಾಗಿ ದುಂದುವೆಚ್ಚ(ದುಂದುವೆಚ್ಚ ಯಾವತ್ತೂ ಖಾಸಗಿ ವಿಚಾರವಲ್ಲ) ಮಾಡುವುದು ತಪ್ಪಿತು. ಎಷ್ಟೋ ಪ್ರಮಾಣದಲ್ಲಿ ಕಸದ ಬುಟ್ಟಿಗೆ ಸೇರಬಹುದಾದ ಆಹಾರ ಉಳಿಯಿತು.

ಮದುವೆಯಂಥ ಸಮಾರಂಭಗಳು ಹಲವರನ್ನು ಒಂದೆಡೆ ಬೆಸೆಯುತ್ತದೆ ನಿಜ. ಆದರೆ ಅಲ್ಲಿನ ಮನುಷ್ಯ ವರ್ತನೆಗಳು ನೈಸರ್ಗಿಕವಾಗಿರುವುದಿಲ್ಲ. ದೈಹಿಕವಾಗಿಯೂ 'ಇರುವಂತೆ' ಇರುವುದಿಲ್ಲ! ಈ ಕೃತ್ರಿಮತೆ ನನ್ನಂಥವರಿಗೆ ಹುಚ್ಚು ಹಿಡಿಸುವ ಸಂಗತಿ.

ಅವರು- ನನ್ನ/ಅಕ್ಕನ/ಅಣ್ಣನ/ತಂಗಿಯ/ತಮ್ಮನ ಮದುವೆಗೆ ಇದನ್ನು /ಇಷ್ಟು ಕೊಟ್ಟಿದ್ದರು. ಅದಕ್ಕಿಂತ ಇಷ್ಟು ಹೆಚ್ಚು ಕೊಡಬೇಕು ಎಂಬ ಅತ್ಯಂತ ಹೇಯವಾದ ವಾಣಿಜ್ಯ ವ್ಯವಹಾರವೇ ಮದುವೆ.

ನಿಜ, ಅದು ಒಂದಷ್ಟು ಕಾರ್ಮಿಕರಿಗೆ ದುಡಿಯುವ, ಹೊಟ್ಟೆಹೊರೆಯುವ ಅವಕಾಶವನ್ನು ಕಲ್ಪಿಸುತ್ತದೆ. ಆದರೆ,  ಕೆಟ್ಟ ಪರಂಪರೆಯನ್ನು ಸೃಷ್ಟಿಸುತ್ತದೆ. ಎಷ್ಟೆಷ್ಟೋ ಕುಟುಂಬಗಳನ್ನು ವರದಕ್ಷಿಣೆ ಮತ್ತು ಆಡಂಬರದ ನೆಪದಲ್ಲಿ ಬೀದಿಗೆ ತಂದು ನಿಲ್ಲಿಸುತ್ತದೆ.

ಈ ಹುಚ್ಚುತನಗಳನ್ನು ದಾಟಿ ರಮ್ಯ ಮೂರ್ನಾಡು ಅವರು ಅಡಿಯಿಟ್ಟ ನಿಲುವು ನನಗೆ ತುಂಬಾ ಹಿಡಿಸಿತು. ಹಾಗಾಗಿ ಅವರನ್ನು ಅಭಿನಂದಿಸುತ್ತೇನೆ.

ಅವರ ಮುಂದಿನ ಜೀವನಕ್ರಮದಲ್ಲಿ ಸುಖವು ಅಂಟಿಕೊಂಡಿರಲಿ.

*

ಕಾಜೂರು ಸತೀಶ್