ನನ್ನ ಕಡೆಯ ಕವಿತೆ

ನನ್ನ ಕಡೆಯ ಕವಿತೆಗೆ

ಹಾಗೇ ಕಣ್ಣುಮುಚ್ಚಿ ಮಲಗುವುದೆಂದರೆ

ಬಿಳಿ ವಸ್ತ್ರ ಹೊದೆಯುವುದೆಂದರೆ

ಹೂವಿನ ಹಾರವೆಂದರೆ

ಅಗರಬತ್ತಿಯ ಪರಿಮಳವೆಂದರೆ

ಅಳುವೆಂದರೆ ಕಣ್ಣೀರೆಂದರೆ

ಮಡಿಕೆಯೆಂದರೆ ಚಟ್ಟವೆಂದರೆ

ಮಡಿಯೆಂದರೆ ಮಂತ್ರವೆಂದರೆ

ಪಟಾಕಿ ಸಿಡಿಮದ್ದುಗಳೆಂದರೆ

ಸುಡುವುದೆಂದರೆ ಹೂಳುವುದೆಂದರೆ

ಸುತರಾಂ ಇಷ್ಟವಿಲ್ಲ

ಒಂದು ಗಾಳಿಪಟ ಮಾಡಿ ತೇಲಿಬಿಡಿ ಅದನ್ನು

ಹೆಸರು ಅಳಿಸಿ ದಾರ ಕತ್ತರಿಸಿಬಿಡಿ

ಬದುಕಿದ್ದಾಗ ಸ್ವಾತಂತ್ರ್ಯವ ಬಯಸಿತ್ತು ಅದು

ನನ್ನ ಕಡೆಯ ಕವಿತೆಗೆ

ಬದುಕುವುದೆಂದರೆ ತುಂಬಾ ಇಷ್ಟ.

*

-ಕಾಜೂರು ಸತೀಶ್