ತಂತ್ರಜ್ಞಾನ ಮತ್ತು ನೆಮ್ಮದಿ

ನನಗೆ ಯಾವಾಗಲೂ ಅನಿಸುತ್ತಿರುತ್ತದೆ- ಇರುವಷ್ಟು ಕಾಲ ನಾವು ಏನನ್ನಾದರೂ ಸಾಧಿಸಿ ಪಡೆಯಬೇಕಿರುವುದಿದ್ದರೆ, ಅದು 'ನೆಮ್ಮದಿ'.

ನೆಮ್ಮದಿಯ ಗಳಿಕೆಗಿರುವ ಅತ್ಯಂತ ದೊಡ್ಡ ತೊಡಕೆಂದರೆ 'ತಂತ್ರಜ್ಞಾನ'. ಅದು ಮೆದುಳನ್ನು ದಾಸನನ್ನಾಗಿ ಮಾಡುತ್ತದೆ. ನಾವು ಒಡೆಯರಾಗಿದ್ದುಕೊಂಡೇ ಅದರ ಗುಲಾಮರಾಗಿಬಿಡುತ್ತೇವೆ. ಸುಲಭೀಕರಣದ ಬಲೆಗೆ ಸಿಲುಕಿ ಒದ್ದಾಡುತ್ತೇವೆ. ಅದರೆದುರು ನಮ್ಮ ದೇಹ ಮತ್ತು ಮನಸ್ಸು ಜಡವಾಗಿಬಿಡುತ್ತವೆ. ಆದರೂ ನಾವು ಬೆವರು ಹರಿಸಿ ದುಡಿಯುವವರಂತೆ ಪೋಷಾಕು ತೊಡುತ್ತೇವೆ. ಒತ್ತಡದಲ್ಲಿ ಸಾಯುತ್ತೇವೆ.

ಎಲ್ಲ ಕೆಲಸಗಳಲ್ಲೂ ತಂತ್ರಜ್ಞಾನವು ಎಷ್ಟು ಸಹಕರಿಸುತ್ತದೋ ಅದರ ದುಪ್ಪಟ್ಟು ಒತ್ತಡವನ್ನು ಬಿಟ್ಟಿಯಾಗಿ ವಿತರಿಸುತ್ತದೆ. ಹಾಗೆ ಒತ್ತಡ ಹೇರಿ ಮಾಡಿಸುವ ಕಾರ್ಯದ ಫಲಿತಾಂಶ ಮಾತ್ರ ಶೂನ್ಯ ಅಥವಾ ನಿರರ್ಥಕ.

*

ಕಾಜೂರು ಸತೀಶ್