ಹುಟ್ಟು, ಜನ್ಮದಿನ ಮತ್ತು ಸಾವಿನ ನಡುವೆ

ಫೇಸ್ಬುಕ್ಕಿಗೆ ಬರುವವರೆಗೆ ನನ್ನ ಜನ್ಮದಿನಾಂಕವನ್ನು ಗುಟ್ಟಾಗಿ ಇಟ್ಟುಕೊಂಡಿದ್ದೆ. ಫೇಸ್ಬುಕ್ಕಿನಿಂದ ಹೈಡ್ ಮಾಡುವಷ್ಟರಲ್ಲಿ ಸುಮಾರು ಜನರ ನೆನಪಿನೊಳಗೆ ಅದು ಸಿಕ್ಕಿಹಾಕಿಕೊಂಡಿತ್ತು.

ನನ್ನ ಜನ್ಮದಿನ ಉಳಿದೆಲ್ಲ ದಿನಗಳಂತೆ ಒಂದು ಸಾಮಾನ್ಯ ದಿನ. ಅದನ್ನು ಹಬ್ಬದಂತೆ ಆಚರಿಸುವುದು ನನ್ನಿಂದ ಅಸಾಧ್ಯ. ಮರಣದ ಕಡೆಗಿನ ಪಯಣ ಒಂದು ಕಡೆ, ಏನನ್ನಾದರೂ ಮಾಡಬೇಕೆಂಬ ತುಡಿತ ಮತ್ತೊಂದು ಕಡೆ. ಅದಕ್ಕಾಗಿ ನಿಸರ್ಗ ಸಹಜ ವಾಂಛೆಗಳನ್ನೆಲ್ಲ ಹತ್ತಿಕ್ಕಿ ಈ ಕ್ಷಣಗಳನ್ನಷ್ಟೇ ಬಾಳುತ್ತಾ ಬದುಕು ಕಟ್ಟಿಕೊಳ್ಳುತ್ತಿರುವವನು ನಾನು.

ನೋವು-ನಲಿವುಗಳನ್ನು ಸ್ಥಿತಪ್ರಜ್ಞತೆಯಿಂದ ಸ್ವೀಕರಿಸಬೇಕೆನ್ನುವುದು ನನ್ನ ತರ್ಕ(ಅದು ಸಾಧ್ಯವಿಲ್ಲದಿದ್ದರೂ). ನೋವನ್ನು ಸಹಿಸುವ ವಿಧಾನವೆಂದರೆ ನಲಿವನ್ನು ಹತ್ತಿರಕ್ಕೆ ಬಿಟ್ಟುಕೊಳ್ಳದಿರುವುದು. ಹುಟ್ಟನ್ನು, ಹುಟ್ಟುಹಬ್ಬವನ್ನು ಸಂಭ್ರಮಿಸುವಾಗ ಸಾವನ್ನು ಸಹಜವಾಗಿ (ಸಂಭ್ರಮಿಸುವುದು ಬೇಡ!) ಸ್ವೀಕರಿಸುವ ಸವಾಲನ್ನು ಎದುರಿಸಬೇಕು.

ಇದರ ನಡುವೆ, ಈ ಹುಟ್ಟುಹಬ್ಬದ ಹಾರೈಕೆಗಳಲ್ಲಿ ಕೆಲವಾದರೂ ನಿಜದ ಪ್ರೀತಿಯನ್ನು ಮೈದುಂಬಿಕೊಂಡಿರುತ್ತದೆ; ಆಚರಿಸದಿದ್ದರೂ ಆ ದಿನವನ್ನು ಲವಲವಿಕೆಯಿಂದಿಟ್ಟಿರುತ್ತದೆ.

*

ಕಾಜೂರು ಸತೀಶ್