ಎಡ ಮತ್ತು ಬಲ

ಮಗಾ,
ಇಸ್ಕೂಲು ಬುಟ್ಮೇಲೆ
ರಸ್ತೆಯ ಎಡಬದಿಯಲ್ಲೇ ನಡ್ಕೊಂಡು ಬಾ.
ಇಸ್ಕೂಲಿಗೆ ಹೋಗುವಾಗ್ಲೂ ಸಹ.


ವಾಹನಗಳು ಹೋಗೋ ರಸ್ತೆಯಂದ್ರೆ
ಹಂಗೇನೇ ಮಗಾ..
ಜ್ವಾಪಾನ.


ಇಲ್ನೋಡು ಹೊಲ್ತವ,
ಎಡಕ್ಕಾದ್ರೂ ಹೋಗು ಬಲಕ್ಕಾದ್ರೂ ಹೋಗು.
ಢಿಕ್ಕಿ ಹೊಡಿಯಕ್ಕೆ
ಯಾವ ವಾಹ್ನಗಳೂ ಇಲ್ಲ.
ನಡೀಬೇಕಂದ್ರೆ
ಒಸಿ ಬೆವ್ರು ಹರಿಸ್ಬೇಕು,
ಅಷ್ಟೇಯ.


ದೊಡ್ಡವ್ನಾದ್ಮೇಲೆ
ಎಡಕ್ಕೂ ಬೇಡ ಬಲಕ್ಕೂ ಬೇಡ.
ನೀನೇ ಒಂದು ವಾಹ್ನ ತಗೊಂಡು
ಮಧ್ಯದಲ್ಲೇ ಹೋಗು.



ಎಡ-ಬಲದಲ್ಲಿ ಚೆಲ್ಲಿರೋ ರಕ್ತ
ಸ್ವಲ್ಪ ಉಬ್ಬಿಕೊಂಡಿರೋ ಅಲ್ಲಿ
ನಿಲ್ಲೋದಿಲ್ಲ ಮಗಾ..
ನಿಲ್ಲೋದೇ ಇಲ್ಲ.
-ಕಾಜೂರು ಸತೀಶ್