ಒಂದು ಬಹುಪರಾಕ್ ಕವಿತೆ

ನನ್ನ ರಕ್ತ ಹೀರಲು ಬರುವ ಸೊಳ್ಳೆಗಳೇ

ನಿಮ್ಮ ಕುರಿತು ಕವಿತೆ ಬರೆದು ಮಾನ ಕಳೆವೆನು

ಕವಿಗಳೆಲ್ಲರೂ ಓದುವ ಪತ್ರಿಕೆಗೆ ಕಳಿಸಿ

ದುಂಬಾಲುಬಿದ್ದು ಪ್ರಕಟಿಸುವವರೆಗೂ ಬಿಡೆನು

ಸಿಗುವ ಸಂಭಾವನೆಯಲ್ಲಿ ಕವಿಗೋಷ್ಠಿ ನಡೆಸುವೆನು

ಹಿರಿಯ ಕವಿಗಳಿಗೆ ಹಾರಗಳನ್ನರ್ಪಿಸುವೆನು

ಹೋಗಿರಿ ಬಸ್ ನಿಲ್ದಾಣಗಳಿಗೆ ಹೋಗಿರಿ ರೈಲು ನಿಲ್ದಾಣಗಳಿಗೆ

ಹೋಗಿರಿ  ಸ್ಲಮ್ಮುಗಳಿಗೆ ಹೋಗಿರಿ ಗುಡಿಸಲುಗಳಿಗೆ

ನನಗಿಲ್ಲಿ ಕೆಲಸವಿದೆ ಕವಿತೆ ಬರೆವ ಕೆಲಸ

ನೋಡಿ ಇಲ್ಲಿ ನಿದ್ದೆಗೆಟ್ಟು ಬರೆಯುತ್ತಿದ್ದೇನೆ

 ನನ್ನ ಕಣ್ಣುಗಳ ಮೇಲಾದರೂ ಕರುಣೆಯಿರಲಿ

*

ಕಾಜೂರು ಸತೀಶ್