ಜಲಸಮಾಧಿ

ತಾವರೆಯನ್ನೇ ನೋಡಿರದಿದ್ದ ಕಾಲದಲ್ಲಿ
ಮೊದಲ ಬಾರಿಗೆ
ತಾವರೆಯ ಚಿತ್ರ ಬರೆದೆ.



ಗದ್ದೆಯಲ್ಲಿ
ಒಂದು ಬಾತುಕೋಳಿ,
ಒಂದು ಹಂಸವೂ ಸುಳಿಯದ ಕಾಲದಲ್ಲಿ
ತಾವರೆಯ ಜೊತೆಗೆ
ಹಂಸವೊಂದರ ಚಿತ್ರ ಬರೆದೆ.



ಅದಾದ ಮೇಲೆ
ಹಂಸಗಳನ್ನೂ,
ತಾವರೆಗಳನ್ನೂ
ತುಂಬಿಕೊಂಡ ಕೊಳವೊಂದನ್ನು
ನೋಡುತ್ತಲೇ ಇದ್ದೇನೆ .



ಕಡಲನ್ನು ನೋಡಿರದಿದ್ದರೂ
ಆಳಸಮುದ್ರದ ನೀಲಿಯನ್ನೂ,
ಅಲೆಗಳ ಸಾಲುಗಳಲ್ಲಿ
ಜೋಕಾಲಿಯಾಡುವ ನನ್ನನ್ನೂ
ಬಿಡಿಸಿದೆ.



ಆಮೇಲೆ
ಹಂಸ,
ಕೊಳ,
ಸಮುದ್ರ ,
ಆಕಾಶದಿಂದಾಚೆಗೆ
ಹಾರಿಹೋದವು.



ನನ್ನ ಕ್ಯಾನ್ವಾಸಿನ ಸ್ಪಷ್ಪ ಗೆರೆಗಳ ತುಂಬ
ಚಿಮ್ಮುವ ತಾವರೆಗಳು
ಕೆಂಪು ,ನೀಲಿಗಳಿಂದ ಕೂಡಿದ
ಉಕ್ಕೇರುವ ಚಿತ್ರದ ಕೊಳಗಳು.




ಆಳ ತಿಳಿದ ಕೋಣದ ಹಾಗೆ
ಕೆಸರುಗೊಳದಲ್ಲಿ ಮುಳುಗೆದ್ದೆ.
ಕಿವಿಗಳ ಸುತ್ತ ಗುಂಯ್ಗುಡುವ
ಕೀಟಗಳ ಓಡಿಸಿದೆ.
ಬೆನ್ನ ಮೇಲಿನ ಕೊಕ್ಕರೆಗಳ ಓಡಿಸಿದೆ .
ಕೊಳದೊಳಗೇ ಸಮಾಧಿಯಾದೆ.



ಕಾಲ ತಪ್ಪಿ
ಅದರೊಳಗೆ ಅರಳಿತೊಂದು
ಬಿಳಿಯ ತಾವರೆ!

**

ಮಲಯಾಳಂ ಮೂಲ- ಬಿಂದು ಒ.ಎನ್.

ಕನ್ನಡಕ್ಕೆ - ಕಾಜೂರು ಸತೀಶ್