ಮ್ಯಾನ್ಹೋಲಿನಲ್ಲಿ ಸತ್ತ ಕವಿತೆ

'ಕಕ್ಕಸು' ಪದ ಬಳಸಲು ಜನ ಹಿಂಜರಿದಾಗ
ಪದಕ್ಕೆ ಪದ ಬೆಳೆದು ಬೀದಿಯಲ್ಲದು ಕಟ್ಟಿನಿಂತಾಗ
ಮತ್ತ್ಯಾರೂ ಸಲೀಸಾಗಿ ಒಳಗಿಳಿಯದಿರುವಾಗ
ಕವಿತೆಯೊಂದಿಳಿಯಿತು ಬಳುಕದೆ ಮ್ಯಾನ್ಹೋಲಿನ ಒಳಗೆ

ನುಗ್ಗಿ ಕೈಯಾಡಿಸಲು ಒಳಗೆ
ಎಷ್ಟೆಷ್ಟೋ ಪದಗಳು ಮೈಲಿಗೆಗೊಂಡು
ಸಾಲು-ಸಾಲು ಕಟ್ಟಿನಿಂತಿವೆ, ಕೆಟ್ಟುನಿಂತಿವೆ

ಎಲ್ಲ ಸ್ವಚ್ಛಗೊಂಡು ಹೊರಬರಬೇಕೆನ್ನುವಾಗ
ಮೂಗುಮುಚ್ಚಿದ, ಬೆಚ್ಚಿದ ಕವಿತೆಗಳೆಲ್ಲ ಬಂದು ಮುಚ್ಚಳ ಮುಚ್ಚಿದವು

ಮ್ಯಾನ್ಹೋಲಿನಲ್ಲಿ ಉಸಿರುಗಟ್ಟಿ ಸತ್ತ ಕವಿತೆಯ ಶವ
ಕವಿಗೂ ಸಿಗಲಿಲ್ಲ ,ಟಿವಿಗೂ ಸಿಗಲಿಲ್ಲ.
*


ಕಾಜೂರು ಸತೀಶ್