ಪ್ರೀತಿಯ ಗುರುಗಳ ನೆನೆದು ನಾಲ್ಕು ಸಾಲು

ಅರ್ಜಿ ಹಾಕಲು ಬಂದ ದಿನ ಸಹಿ ಕಾಲಂನಲ್ಲಿ ಅವರ ಹೆಸರು ನೋಡಿದ್ದೆ. ಮೊದಲ ತರಗತಿಯಲ್ಲಿ ಶಿಕ್ಷಣ ವ್ಯವಸ್ಥೆಯಲ್ಲಿ ಮೌಲ್ಯ ಶಿಕ್ಷಣದ ಅಗತ್ಯತೆಯನ್ನು ಕುರಿತು ಇಂಗ್ಲಿಷ್ನಲ್ಲಿ ಬರೆಯಲು, ಮಾತನಾಡಲು ಹೇಳಿದ್ದರು. ಮೊದಲು ಇಂಗ್ಲಿಷ್, ಆಮೇಲೆ ಮನೋವಿಜ್ಞಾನವನ್ನು(ಜೊತೆಗೆ ಸಂಗೀತ) ಹೇಳಿಕೊಟ್ಟರು.

ಇವೆಲ್ಲಕ್ಕಿಂತ ಹೆಚ್ಚಾಗಿ ಮನುಷ್ಯತ್ವವನ್ನು ಬದುಕಿ ತೋರಿಸಿದರು.

ಈ ಕಾರಣಗಳಿಂದಾಗಿಯೇ ಅವರ ವ್ಯಕ್ತಿತ್ವ ನನ್ನನ್ನು ಗಾಢವಾಗಿ ಕಾಡುತ್ತಿರುವುದು.


ವೇದಿಕೆಯೆಂದರೆ 'ಬಲಿಪೀಠ'ವೆಂದುಕೊಳ್ಳುತ್ತಿದ್ದ ನನಗೆ, ಜತನವಾಗಿ ಕಾಪಿಟ್ಟುಕೊಂಡ ಮೌನ ಅನೇಕ ಸೂಕ್ಷ್ಮಗಳನ್ನು ಹೇಳಿಕೊಟ್ಟಿದೆ. ನನ್ನ ಸುತ್ತಲನ್ನು ಬೆರಗುಗಣ್ಣುಗಳೊಂದಿಗೆ ಶೋಧಿಸುತ್ತಿದ್ದ ಆ ಮೌನ ಇಂತಹ ಗುರುಗಳನ್ನು ಗುರುತಿಸುವುದನ್ನೂ, ಗೌರವಿಸುವುದನ್ನೂ ಹೇಳಿಕೊಟ್ಟಿತ್ತು.

ಅವರು ಮೈಸೂರಿನಿಂದ ಬಂದು ಹೋಗುತ್ತಿದ್ದರು. ಸೂರ್ಯೋದಯಕ್ಕೂ ಮುಂಚೆ ತಿಂಡಿ ತಿಂದು ಕಾಲೇಜಿಗೆ ಬರುವ, ಸೂರ್ಯಾಸ್ತದ ನಂತರ ಮನೆಗೆ ಹಿಂತಿರುಗುವ ವಿಲಕ್ಷಣ ಸುಖವನ್ನು ನಾನೂ ಅನುಭವಿಸಿದ್ದೆ. ಆ ನಡುವೆ ಅವರ ವರ್ಗಾವಣಾ ಸುದ್ದಿ ಕೇಳಿ 'ಛೆ!' ಎಂದು ನನಗೇ ಕೇಳಿಸುವಷ್ಟು ಜೋರಾಗಿ ಉದ್ಘರಿಸಿದ್ದೆ. 'ಒಂದು ಮಾತಾದರೂ ಹೇಳಿ ಹೋಗಬಹುದಿತ್ತು' ಹೇಳಿಕೊಂಡಿದ್ದೆ ನನಗೆ ನಾನೇ.

ಒಮ್ಮೆ 'ತನುವು ನಿನ್ನದು' ಗೀತೆಯನ್ನು ಕಷ್ಟಪಟ್ಟು ಹಾಡಿದ್ದೆ. ಕುಸಿದುಹೋಗುತ್ತಿದ್ದ ನನ್ನನ್ನು ಅವರ ಮೆಚ್ಚುಗೆಯ ನುಡಿಗಳು ಮೇಲಿತ್ತಿದ್ದವು.

ಸಂಗೀತ ವಾದ್ಯಗಳ ನಿಯೋಜಿತ ಕಾರ್ಯವನ್ನು ಸಲ್ಲಿಸಲು 'ನಾಳೆಯೇ ಅಂತಿಮ ದಿನ' ಎಂದಿದ್ದಕ್ಕೆ ರಾತ್ರಿಯಿಡೀ ನಿದ್ದೆಗೆಟ್ಟು ಬರೆದು ನಿದ್ರಾ ಮಂಪರಿನಲ್ಲಿ ಅದನ್ನು ಮನೆಯಲ್ಲೇ ಇಟ್ಟು ಬಂದಿದ್ದೆ. 'ಮೇಡಂ ಮರೆತುಬಂದೆ' ಎಂದಿದ್ದಷ್ಟೆ 'ಆಯ್ತು' ಎಂದು ನಕ್ಕರು ಮುಗ್ಧವಾಗಿ.

ಇಂತಹ ಆರ್ದ್ರ ನೆನಪುಗಳೇ ನನ್ನನ್ನೂ, ನನ್ನೊಳಗಿನ ಕಾಲವನ್ನೂ ಮತ್ತೆ ಮತ್ತೆ ಬದುಕಿಸುತ್ತಿರುವುದು. ಈಗ ಅವರ ಮೊಬೈಲ್ ಸಂಖ್ಯೆ ಸಿಕ್ಕ ಮೇಲೆ ಇದನ್ನೆಲ್ಲ, ಹೀಗೆಲ್ಲ ಬರೆಯುತ್ತಿದ್ದೇನೆ.

ನಮಸ್ತೆ ಪ್ರೀತಿಯ ಶೋಭಾ ಮೇಡಂ, ನಿಮ್ಮಂತಹ ಗುರುಗಳು ಈ ಲೋಕಕ್ಕೆ ದಕ್ಕುತ್ತಲೇ ಇರಲಿ!

*

ಕಾಜೂರು ಸತೀಶ್

ಬೆಕ್ಕುಗಳು

ಬೇಕಾದಷ್ಟು ಊಟ
ತಿಂಡಿ
ಮೀನು
ಮಾಂಸ
ಮಲಗಲು ಒಲೆಬುಡ.


ಆದರೂ
ಭದ್ರವಾಗಿ ಮುಚ್ಚಿಟ್ಟವುಗಳ
ಒಳಗೆಲ್ಲ ತಲೆತೂರಿಸಿ
ನೆಕ್ಕಿ
ಯಾರೂ ಕಾಣದಂತೆ
ಅದು
ಅಡುಗೆ ಕೋಣೆಗೂ
ಮಲಗುವ ಕೋಣೆಗೂ
ಅತ್ತಿಂದಿತ್ತ ಇತ್ತಿಂದತ್ತ
ಓಡಾಡುತ್ತಲೇ ಇವೆ!
*

ಮಲಯಾಳಂ ಮೂಲ- ಪವಿತ್ರನ್ ತೀಕ್ಕುನಿ

ಕನ್ನಡಕ್ಕೆ- ಕಾಜೂರು ಸತೀಶ್

ಮೂಢರಾಗುತ್ತಿರುವ ಕಾಲದಲ್ಲಿ

ಮನುಷ್ಯ ತೀರಾ ಭಾವುಕನಾದಾಗ ಹುಟ್ಟುವ ಅಭಿವ್ಯಕ್ತಿ Talkative ಆಗಿದ್ದರೂ ಅದು ಸತ್ಯನಿಷ್ಠವಾಗಿಯೂ ಪ್ರಾಮಾಣಿಕವಾಗಿಯೂ ಆಗಿರುತ್ತದೆ.
*
ಒಬ್ಬ ವ್ಯಕ್ತಿಯನ್ನು ವೈಚಾರಿಕವಾಗಿ ದಮನ ಮಾಡುವುದು ಎಷ್ಟು ಸುಲಭ!

ತಿಳಿದೇ ಇರುವ ABCDಯನ್ನು ಓದಿಸುವುದು, ಬರೆಸುವುದು. ಮತ್ತೆ ಮತ್ತೆ ಓದಿಸುವುದು, ಬರೆಸುವುದು.

ಅಂಥವರನ್ನೇ ಕರೆದು ಗುಂಪು ಮಾಡಿ ವಾರವಿಡೀ ಅದನ್ನೇ ಬರೆಸುವುದು, ಓದಿಸುವುದು. ಹೇಗೆಲ್ಲ ಓದಬಹುದು ಹೇಗೆಲ್ಲ ಬರೆಯಬಹುದೆಂದು ಚರ್ಚೆ ಮಾಡಿಸುವುದು. ರಾಗವಾಗಿ ಓದಿಸುವುದು, ಹಾಡಿಸುವುದು. ನೃತ್ಯ ಮಾಡಿಸುತ್ತಾ ಓದಿಸುವುದು. ಡ್ರಾಯಿಂಗ್ ಶೀಟಿನಲ್ಲಿ ಬರೆಸುವುದು.

ಹೀಗೆಯೇ ಅಆಇಈ, ರಗಸದಅಗಳನ್ನು , Noun Pronounಗಳನ್ನು Suffix Prefixಗಳನ್ನು!

RIP ಮೇಷ್ಟ್ರೇ ಮತ್ತು ಬಡ ವಿದ್ಯಾರ್ಥಿಗಳೇ!!
*


ಶಾಲೆಯಲ್ಲಿ ವಿದ್ಯಾರ್ಥಿಗಳೊಂದಿಗಿರದ ಶಿಕ್ಷಕ ಮತ್ತು ಅವನನ್ನು ಅಲ್ಲಿ ಇರಗೊಡದ ವ್ಯವಸ್ಥೆ ಘೋರ ಪಾಪವನ್ನು ಸುತ್ತಿಕೊಳ್ಳುತ್ತದೆ.
*

ಒಂದು ದಿನವೂ ತರಗತಿಗೆ ಹೋಗಿ ವಿದ್ಯಾರ್ಥಿಗಳಿಗೆ ಕಲಿಕೆಯ ಅನುಭವವನ್ನು ನೀಡದ ಆ ಇಬ್ಬರಿಗೆ ರಾಜ್ಯ ಪ್ರಶಸ್ತಿ ಸಿಕ್ಕಾಗ ನನ್ನ ಕಾಲದ ಚಿತ್ರ ಮತ್ತಷ್ಟೂ ಸ್ಪಷ್ಟವಾಯಿತು
*


ನಿಜವಾಗಿಯೂ ಶಿಕ್ಷಕರಿಗೆ ಎಂತಹ ತರಬೇತಿಯ ಅಗತ್ಯತೆಯಿದೆ? ಶಿಕ್ಷಕರನ್ನು ವಿದ್ಯಾರ್ಥಿಗಳ ಮಟ್ಟಕ್ಕಿಳಿಸಿ ಕೊಡುವ 'ಬುಡುಬುಡಿಕೆ'ಗಿಂತ ಈ ಬಗೆಯ ತರಬೇತಿಗಳನ್ನು ಕೊಡಬೇಕಾಗಿದೆ:

¶ ಅಕ್ಕಿ/ಬೇಳೆ/ಸಮವಸ್ತ್ರ/ಪುಸ್ತಕಗಳ ಚೀಲಗಳನ್ನು ಸರಾಗವಾಗಿ ಹೊತ್ತೊಯ್ಯುವ ತರಬೇತಿ

¶ ಕೆಲವೇ ಕೆಲವು ನಿಮಿಷಗಳಲ್ಲಿ ಶಾಲಾವರಣವನ್ನು ಗುಡಿಸಿ ಸ್ವಚ್ಛಗೊಳಿಸುವ ತರಬೇತಿ

¶ ವಾರಕ್ಕೆ ಕನಿಷ್ಟ ಮೂರು ದಿನಗಳಾದರೂ ಶಾಲೆಗೆ ಹೋಗಿ ನಿಯತ್ತಾಗಿ ದುಡಿಯುವ ತರಬೇತಿ

¶ ಎಲ್ಲ ಕೆಲಸಗಳನ್ನು ಮಾಡಲು ಬೇಕಾದ fitnessನ್ನು ಕಾಯ್ದುಕೊಳ್ಳುವ ತರಬೇತಿ

¶ ರಾಜಕಾರಣಿಗಳು, ಅಧಿಕಾರಿಗಳ ಬೆನ್ನುಬೀಳದೆಯೂ ಬದುಕುವ ತರಬೇತಿ

¶ ಏಕಕಾಲದಲ್ಲಿ ಏಳೂ ತರಗತಿಗಳನ್ನು ನಿಯಂತ್ರಿಸುವ, ಕಲಿಸುವ, ಅವಷ್ಟಕ್ಕೂ ಪಾಠಟಿಪ್ಪಣಿ, ಸಿಸಿಇ ದಾಖಲೆಗಳನ್ನು ಇಡುವ ತರಬೇತಿ

¶ ಬಿದ್ದು ಕೈಕಾಲು ಮುರಿದುಕೊಳ್ಳುವ ಅಥವಾ ಗಾಯಗೊಳ್ಳುವ ಮಕ್ಕಳಿಗೆ ಪ್ರಥಮ ಚಿಕಿತ್ಸೆ ನೀಡುವ ತರಬೇತಿ

¶ ಹೇಳಿದ್ದನ್ನೆಲ್ಲ ಒಪ್ಪಿಕೊಳ್ಳುವ, ಉಗಿದರೂ ಒರೆಸಿಕೊಳ್ಳದೆ ಬದುಕುವ ತರಬೇತಿ

¶ ವಿದ್ಯಾರ್ಥಿಗಳ, ಸಹೋದ್ಯೋಗಿಗಳ ಜಗಳ ಬಿಡಿಸುವ ತರಬೇತಿ

¶ ಎಲ್ಲ ತರಬೇತಿಗಳನ್ನು ಸ್ವಂತ ಖರ್ಚಿನಿಂದ ಪೂರೈಸಿಯೂ ಬದುಕುವುದನ್ನು ಕಲಿಸುವ ತರಬೇತಿ


RIP ಮೇಷ್ಟ್ರಿಗೆ!
*

ಕಾಜೂರು ಸತೀಶ್