ಆಧುನಿಕತೆ

ಪ್ಲೀಸ್ ಕಾಲ್ ಮಿ ' ಎಂಬ ಸಂದೇಶ ಬಂದಿತ್ತು. ತಿಮ್ಮ ಕರೆ ಮಾಡುವ ಸ್ಥಿತಿಯಲ್ಲಿ ಇರಲಿಲ್ಲ. ಮಾಡಿದ್ದರೂ ಅರ್ಧ ಗಂಟೆ ಕರೆಯಲ್ಲಿ ನಿರತನಾಗಬೇಕಿತ್ತು.

ಅವರಿಗೆ ನನ್ನ ಸಹೋದರನ ದೂರವಾಣಿ ಸಂಖ್ಯೆ ತುರ್ತಾಗಿ ಬೇಕಿತ್ತು. ಅದಕ್ಕಾಗಿ ಅವರು ಹಲವರಿಗೆ ಕರೆ ಮಾಡಿದ್ದರು.

'ಪ್ಲೀಸ್ ಕಾಲ್ ಮಿ' ಯ ಬದಲು 'ಅಣ್ಣನ ಮೊಬೈಲ್ ಸಂಖ್ಯೆ ಕಳಿಸಿ' ಎಂಬ ಸಂದೇಶ ಬಂದಿದ್ದಿದ್ದರೆ ಇಬ್ಬರಿಗೂ ನೆಮ್ಮದಿ ಇರುತ್ತಿತ್ತು, ಕರೆ ಸ್ವೀಕರಿಸಿ ಇಲ್ಲ ಎಂದವರ ಸಮಯ ಕೂಡ ಉಳಿಯುತ್ತಿತ್ತು' ತಿಮ್ಮ ಯೋಚಿಸಿದ.

*

ಕಾಜೂರು ಸತೀಶ್

ಕೊಂದವರು

'ಮಹಾತ್ಮನನ್ನು ಕೊಂದಿದ್ದು ಯಾರು?' ಮೇಷ್ಟ್ರು ಕೇಳಿದರು. ಮಕ್ಕಳು ಹೇಳದಿದ್ದಾಗ 'ಮುತ್ತಪ್ಪ ಕಣ್ರೋ' ಎಂದರು. ಮುತ್ತಪ್ಪ ಹುಟ್ಟಿದ್ದು, ಬೆಳೆದದ್ದು, ಓದಿದ್ದು.. ಹೀಗೆ ಅವನ ಜೀವನ ಚರಿತ್ರೆಯನ್ನೇ ತೆರೆದಿಟ್ಟರು.

ಪರೀಕ್ಷೆಯಲ್ಲೂ ಮಹಾತ್ಮನನ್ನು ಕೊಂದವರ ಹೆಸರನ್ನು ಕೇಳಿದರು. ಮಕ್ಕಳು ಸರಿಯುತ್ತರ ಬರೆದು ಉತ್ತೀರ್ಣರಾದರು.

ಕಡೆಯ ಬೆಂಚಿನಲ್ಲಿ ಕುಳಿತಿದ್ದ ತಿಮ್ಮ ಯೋಚಿಸಿದ. ಮುತ್ತಪ್ಪನ ಬಗ್ಗೆ ತಿಳಿಯಿತು. ಮಹಾತ್ಮನ ಬಗ್ಗೆ ಯಾರನ್ನು ಕೇಳಿ ತಿಳಿದುಕೊಳ್ಳಲಿ?

*

ಕಾಜೂರು ಸತೀಶ್

ಮೌನ

ಯುವಕ ಯುವತಿಯರು ಹುಚ್ಚೆದ್ದು ಕುಣಿಯುತ್ತಿದ್ದರು. ಡಿಜೆ ಸದ್ದಿಗೆ ಯುವಕನೊಬ್ಬ ಎದೆಯೊಡೆದು ಸತ್ತ.

ಮೃತನಿಗೆ ಒಂದು ನಿಮಿಷದ ಮೌನಾಚರಣೆ ಮಾಡಲಾಯಿತು. ಆ ಒಂದು ನಿಮಿಷದ ಮೌನವನ್ನು ಅನುಭವಿಸಲಾಗದೆ ಹಲವು ಯುವಕ ಯುವತಿಯರು ಕುಸಿದುಬಿದ್ದರು.

ಡಿಜೆಯ ಸದ್ದಿಗೆ ಮತ್ತೆ ಎಚ್ಚರವಾದರು.

*

ಕಾಜೂರು ಸತೀಶ್

ಚಿಟ್ಟೆ

ಉದುರುವ ಹೂವುಗಳು

ಚಿಟ್ಟೆಗಳಾಗಿ

ಭೂಮಿಗೆ ಮರಳುತ್ತವೆಂದು

ಮಗುವಿಗೆ ಅಮ್ಮ ಹೇಳಿದ್ದರು

ಮಗು

ಮುಂದೊಂದು ದಿನ

ಓದಿ ಮೇಷ್ಟ್ರಾಯಿತು.

ಅಮ್ಮ ಹೇಳಿಕೊಟ್ಟ

ಅದೇ ಕಥೆಯನ್ನು

ಮೇಷ್ಟ್ರು ಮಕ್ಕಳಿಗೆ ಹೇಳಿದರು 

ಮಕ್ಕಳು ನಕ್ಕರು 

'ಎಂಥಾ ಪೆದ್ದ ಮೇಷ್ಟ್ರು!'

ಆದರೆ, 

ಅಷ್ಟು ಮಕ್ಕಳ ಪೈಕಿ 

ಒಬ್ಬಳು ಮಾತ್ರ ಅತ್ತಳು 

ಮೇಷ್ಟ್ರ ಹಾಗೆ 

ಅವಳಿಗೂ ಅಮ್ಮನಿರಲಿಲ್ಲ.

*

ಮಲಯಾಳಂ ಮೂಲ - ಹರೀಶ್ ಶಕ್ತಿಧರನ್ 

ಕನ್ನಡಕ್ಕೆ- ಕಾಜೂರು ಸತೀಶ್ 

ಹೂವು

ಕಂದಾಯ ಕಚೇರಿಗೆ ಹೋಗಿ ಬಂದ ತಿಮ್ಮ ತನ್ನದೇ ಭಾವಚಿತ್ರಕ್ಕೆ ಮಾಲೆಮಾಡಲು ಹೂ ಕೊಯ್ಯುತ್ತಿದ್ದ. ಹೂವಿಗೆ ಹೇಳಿದ.

"ಹೂವೇ, ದಯವಿಟ್ಟು ಕ್ಷಮಿಸು. ಜಗತ್ತು ಹಿಂಸೆಯನ್ನೇ ಬಿತ್ತುತ್ತದೆ. ನಾನೂ ಈಗ ಅದನ್ನೇ ಮಾಡುತ್ತಿರುವೆ!''

*

ಕಾಜೂರು ಸತೀಶ್