ವಿವಿಧ ಸ್ಪರ್ಧೆಗಳಲ್ಲಿ ಬಹುಮಾನ ಪಡೆಯುತ್ತಾ ಪತ್ರಿಕೆಗಳಲ್ಲಿ ಸದಾ ಸದ್ದುಮಾಡುವ ಕಥೆಗಾರರು ಈ ಬಾರಿಯ ಕಥಾಸ್ಪರ್ಧೆಗೆ ಕಥೆ ಕಳುಹಿಸುವುದಿಲ್ಲವೆಂಬುದನ್ನು ಖಾತ್ರಿಪಡಿಸಿಕೊಂಡ 'ತಿಮ್ಮ' ಅವರ ಹೆಸರಿನಲ್ಲಿ ತನ್ನ ಕಥೆಯೊಂದನ್ನು ಕಳುಹಿಸಿದ.
ತಿಮ್ಮನ ನಿರೀಕ್ಷೆಯಂತೆ ಆ ಕಥೆಗೆ ಮೊದಲ ಬಹುಮಾನ ಬಂತು!
ತಮ್ಮ ಹೆಸರನ್ನು ನೋಡಿದ ಆ ಕಥೆಗಾರರು ಹೌಹಾರಿ ' ಇದು ಅಕ್ಷಮ್ಯ. ಹೀಗೆ ನನ್ನ ಹೆಸರನ್ನು ಬಳಸಿದವರ ಕಥೆಯನ್ನು ಇನ್ನುಮುಂದೆ ಯಾವುದೇ ಪತ್ರಿಕೆಯಲ್ಲಿ ಪ್ರಕಟಿಸಬಾರದು' ಎಂದು ಜಾಲತಾಣಗಳಲ್ಲಿ ಬರೆದುಕೊಂಡರು.
ಆ ಕಥೆಯನ್ನು ತಿಮ್ಮನೇ ಬರೆದದ್ದೆಂದು ತಿಮ್ಮನ ಹೊರತಾಗಿ ಮತ್ತ್ಯಾರಿಗೂ ತಿಳಿದಿರಲಿಲ್ಲ, ತಿಳಿಯಲೂ ಇಲ್ಲ. ತಿಮ್ಮ ಬರೆದ ಆ ಕಥೆಯ ವಸ್ತುವೂ ಅದೇ ಆಗಿತ್ತು: ಹೆಸರಾಂತ ಕಥೆಗಾರನ ಹೆಸರಿನಲ್ಲಿ ಯುವ ಕಥೆಗಾರನೊಬ್ಬ ಕಥೆ ಬರೆದು ಅದಕ್ಕೆ ಬಹುಮಾನ ಘೋಷಣೆಯಾದ ಮೇಲೆ ನಡೆಯುವ 'ಪ್ರಸಂಗ'ಗಳು!
*
ಕಾಜೂರು ಸತೀಶ್
