ಮುಖಾಮುಖಿ

ಅವರ ಕಣ್ಣಿಗೆ ಬೀಳದಿರಲೆಂದು
ಬೆಳದಿಂಗಳನ್ನು ತಳ್ಳಿ ಆಚೆ ಕಳಿಸಿದೆ
ಪಾದಚಾರಿ ರಸ್ತೆ
ಭಯಪಡುವ ಅಗತ್ಯವಿಲ್ಲ
ಕ್ಯಾಂಪಿನಿಂದ ತಪ್ಪಿಸಿಕೊಂಡು ಹೊರನಡೆದೆ.

ಮರೆತುಹೋದ ದಾರಿ
ಗುಂಡಿಗಳು, ತಿರುವುಗಳು
ನಾಜಿ಼ ಗೋಡೆಗಳು
ಕೊಲೆಯಾದ ಜಾಗಗಳು...
ಉಕ್ಕಿ ಹರಿಯಲು
ಕಣ್ಣೀರೋ, ಹೊಳೆಯೋ...
ಬಿದ್ದು ಒದ್ದಾಡಲು
ಹೃದಯವೋ, ಭೂಮಿಯೋ...

ಖಾತ್ರಿಯಾಗಿತ್ತು
ಯಾವುದೂ ಸಾಕ್ಷಿಯಾಗಲಾರವೆಂದು.
ದಾರಿ ಇನ್ನೂ ದೂರವಿದೆ
ಮನಸ್ಸು ನಿನ್ನ ಕನಸಿನಲ್ಲಿ ಮುಳುಗಿದೆ
ನಿನ್ನ ಹಸಿಹಸಿ ತುಟಿಗಳ ನೆನಪು
ಇನ್ನೂ ಅಂಟಿಕೊಂಡಿದೆ ನನ್ನ ತುಟಿಗಳಲ್ಲಿ.

ಮುಂದೆ ಎಲ್ಲೋ ಸಿದ್ಧತೆಗಳ ಸದ್ದು
ಉಜ್ಜಿ ಹರಿತಗೊಳಿಸಿದ ಖಡ್ಗಗಳು
ಆರ್ಭಟಿಸುವ ಹಾಗೆ
ಬಂದೂಕಿನ ಉಂಡೆಗಳು
ಆಲಂಗಿಸಲು ಬರುವ ಹಾಗೆ.

ಚಂಗನೆ ಜಿಗಿದು
ಅಲ್ಲಿಂದ ತಪ್ಪಿಸಿಕೊಂಡು
ಪೊದೆಯಲ್ಲಿ ಅಡಗಿ ಕುಳಿತೆ
ಏದುಸಿರು ಬಿಟ್ಟು
ಗಡಗಡನೆ ನಡುಗಿ
ಅರೆಜೀವವಾಗಿ
ಹಿಂತಿರುಗಿ ನೋಡಿದರೆ
ಬೆನ್ನ ಹಿಂದೆಯೇ ನೀನು!
ಅಳು ತಡೆಯಲಾರದೆ ಅತ್ತುಬಿಟ್ಟೆ
ನೀನು ನಗುತ್ತಾ ಅಪ್ಪಿಕೊಂಡೆ.

ನನ್ನ ಮುದ್ದಿಸುವಾಗ
ನಿನ್ನ ನೀಳ ಅಂಗಿಯಲ್ಲಿ
ಸ್ವಸ್ತಿಕ್# ಚಿಹ್ನೆಯನ್ನು ಕಂಡೆ
ಕಪ್ಪು ಸಮವಸ್ತ್ರಕ್ಕೆ ಅಂಟಿಕೊಂಡ
ಅದ ನೋಡುತ್ತಲೇ
ಗುಂಡು ಎದೆ ಸೀಳುವ ಮೊದಲೇ
ನಾನು ಸತ್ತುಹೋಗಿದ್ದೆ.
*

ಮಲಯಾಳಂ ಮೂಲ - ಸುತಾರ್ಯ ಸಿ

ಕನ್ನಡಕ್ಕೆ- ಕಾಜೂರು ಸತೀಶ್

# ಸ್ವಸ್ತಿಕ್-ಹಿಟ್ಲರ್‍ನ ಚಿಹ್ನೆ