Thursday, March 16, 2017

ಮರ

ಮುರಿದು ಬೀಳುವಾಗ
ಮರ ಮಾತನಾಡುತ್ತದೆ
ಜೀವಮಾನದ ನಾಲ್ಕೇ ನಾಲ್ಕು ಶಬ್ದ!
*
ಎಲ್ಲೋ ಮರಕಡಿಯುತ್ತಿದ್ದಾರೆ
ಕಿರುಚುತ್ತಿರುವುದು ಯಂತ್ರವೋ/ ಮರವೋ?
*
ಮರ ಮಾತು ಕಲಿತ ದಿನ
ಮನುಷ್ಯ ಭಿತ್ತಿಪತ್ರವಾಗಿ ಅಂಟಿಕೊಂಡಿರುತ್ತಾನೆ
ಅದರ ಗೋಂದಿನಲ್ಲಿ.
*
ಮರ
ಸದ್ದಿಲ್ಲದೆ ದೇವರುಗಳ ಸಾಕಿಕೊಂಡಿದೆ
ಮನುಷ್ಯ ಕೊಡಲಿ ಹಿಡಿದಿದ್ದಾನೆ.
*
ಶ್ವಾಸಕೋಶಕ್ಕೆ ಮರದ ಕಥೆ ಹೇಳಿದೆ
'ಒಂದು ಎಲೆಯನ್ನಾದರೂ ಮೂಗಿನೊಳಗಿಳಿಸು
ನೋಡಬೇಕು' ಎಂದಿತು.
*


ಎಂದೋ ಉರುಳಿಬಿದ್ದಿದೆ ಮರ
ಇನ್ನೂ ಶವದ ನಾತವಿಲ್ಲ.
*
ಈ ಮರ ಸತ್ತು ವರುಷ ಎರಡು.
ನಿಂತೇ ಇದೆ ಇನ್ನೂ
ದಿನಕ್ಕೆರಡು ಸಲ ಸೂರ್ಯನಿಗೆ ಸೋಮಾರಿ ಕಟ್ಟೆ.
*
ಅಷ್ಟೋ ಇಷ್ಟೋ ಉಳಿದ ಭೂಮಿಯನ್ನು
ಹಿಡಿದಿಟ್ಟುಕೊಂಡಿದೆ ಮರ ಬೇರಿನಲ್ಲಿ
*

ಕಾಜೂರು ಸತೀಶ್

No comments:

Post a Comment

ಎಂ ಆರ್ ಕಮಲ ಅವರ ಮಾರಿಬಿಡಿ ಕವನ ಸಂಕಲನದ ಕುರಿತು

ಮಾರಿಬಿಡಿ ಇದು ಎಂ. ಆರ್. ಕಮಲ ಅವರ ನಾಲ್ಕನೆಯ ಕವನ ಸಂಕಲನ. ಉಪಶೀರ್ಷಿಕೆಯೇ ಹೇಳುವಂತೆ ಈ ಕಾಲದ ತಲ್ಲಣ ಗಳಿವು. ಸಂಕಲನವು ಮನುಷ್ಯ ಸಂಬಂಧಗಳು ಈ ಅಂತರ್ಜಾಲ ಯುಗದಲ್ಲಿ ...