ನನ್ನೊಳಗೆ ಇಳಿಯುವಾಗ

ಕರೆಗಂಟೆ ಇಲ್ಲದ ಮನೆ ನನ್ನದು

ನನ್ನ ಪಕ್ಕೆಲುಬುಗಳ ತಟ್ಟಿದರೆ ಸಾಕು

ಬಾಗಿಲು ತೆರೆಯುವೆ.



ಎಲ್ಲ ಹೃದಯಗಳ ಬಣ್ಣ ನನ್ನ ಮನೆಗೆ.

ತಕರಾರು ತೆಗೆಯದೇ

ಪೈಂಟರ್ನಿಂದ ಬಳಿಸಿಕೊಂಡದ್ದು.



ಬನ್ನಿ

ಕರುಳ ಚಾಪೆ ಹಾಸುವೆ

ಕೂತು ಸುಧಾರಿಸಿಕೊಳ್ಳಿರಿ

ಬೇಕಿದ್ದರೆ

ಮೆದುಳು, ಹೃದಯ, ರಕ್ತದ ಕೋಣೆಗಳ ಬಗ್ಗೆ

ಚರ್ಚೆ ನಡೆಸಿರಿ.



ಬೀಗವೂ ಇಲ್ಲ ನನ್ನ ಮನೆಗೆ.

ಗಾಳಿ ಮಳೆಗೆ ಮುರಿದುಬಿದ್ದರೆ

ಮಣ್ಣೇ ನನ್ನ ಮನೆ.



ಅಲ್ಲಿಗೂ ಬರುವಿರಾದರೆ ಬನ್ನಿ

ಉಗುರು, ರೋಮ, ಮೂಳೆಗಳ ಬಗ್ಗೆ

ಚರ್ಚೆ ನಡೆಸಿರಿ.



ಕರೆಗಂಟೆ ಅಲ್ಲಿಲ್ಲದಿದ್ದರೂ

ಗಾಳಿಯನ್ನು ತಟ್ಟಿ ಸಾಕು

ಬಾಗಿಲು ತೆರೆಯುವೆ.



**
-ಕಾಜೂರು ಸತೀಶ್