Tuesday, May 19, 2015

ತಲೆದಿಂಬು

-1-

ದಿಂಬು ಊದಿಕೊಳ್ಳುತ್ತದೆ
ನಿನ್ನ ಕಣ್ಣುಗಳ ಹಾಗೆ



ದುಃಖಿಸದಿರು
ತಲೆದಿಂಬು ಊದಿಕೊಂಡಿದ್ದು ಸಾಕು.



ಸರಿ, ದಿಂಬನ್ನೂ ಊದಿಸು
ಬಿಡುಗಡೆಗೊಳ್ಳಲಿ ನಿನ್ನ ಕಣ್ಣುಗಳು .


-2-

ಚಿಕ್ಕವನಿದ್ದಾಗಲೂ ದಿಂಬುಗಳಿದ್ದವು
ಹಳೆಯ ಅಂಗಿ-ಚಡ್ಡಿ ಅದರೊಳಗೆ.


ಎಷ್ಟು ಹೊಲಿದು ಬಾಯ್ಮುಚ್ಚಿದ್ದರೂ
ಅಂಗಿ ಚಡ್ಡಿಗಳ ಕೈಕಾಲುಗಳು ಇಣುಕಿ
ಬಾಲ್ಯ ಹೊರಬರುತ್ತಲೇ ಇರುತ್ತದೆ .


-3-

ಈಗೀಗ ಗಾಳಿ ತುಂಬಿಸುವ ದಿಂಬುಗಳಿವೆ.
ಊದಿದವರ ಒತ್ತಡ ಊದಿಸುತ್ತದೆ ಅದನು.


ಊದುವ ಗಾಳಿ ಒಳಗಿನದ್ದು.
ತುಂಬಿಕೊಳ್ಳುವ ದಿಂಬಿಗೂ ಗಾಳಿ ಒಳಗಿನದ್ದೇ.


ಹೊರಗಿನದ್ದು ತುಂಬಿಕೊಳ್ಳುವುದಿಲ್ಲ
ಬಯಲ ಬಲೂನಿಗೆ ಲೆಕ್ಕವಿಲ್ಲದಷ್ಟು ರಂಧ್ರಗಳು.

-4-

ದುಃಖಕ್ಕೆ ತಲೆಗೊಡುವ ದಿಂಬೇ,
ನಗು
ನಗು.

**

-ಕಾಜೂರು ಸತೀಶ್

No comments:

Post a Comment