Wednesday, July 2, 2014

ಶಿವ

ಶಿವ
ಪ್ರತಿದಿನ
ಹಣೆಗೆ ಟಾರ್ಚ್ ಕಟ್ಟಿ
ರಬ್ಬರ್ ಟ್ಯಾಪಿಂಗಿಗೆ ಹೊರಡುತ್ತಾನೆ.
ತಮಾಷೆಗೆ ನಾನವನನ್ನು
'ಮುಕ್ಕಣ್ಣ' ಎನ್ನುತ್ತೇನೆ.





ಅಪ್ಪಿತಪ್ಪಿ ಬಿದ್ದು
ಅವನ 'ಹಣೆಗಣ್ಣು' ಒಡೆದರೆ
ದಾರಿ ಕಾಣೋದಿಲ್ಲ-
ವಿಷಜಂತುಗಳಿರುವ ರಬ್ಬರ್ ತೋಟದಲ್ಲಿ .





ಮುಂಜಾನೆ ಮೂರರ ಸಮಯ.
ನನ್ನ ಕವಿತೆಗಳು ಹಡೆಯುವ ಹೊತ್ತು .
ಆ ಏಕಾಂತದಲ್ಲಿ ಶಿವನೂ ಒಬ್ಬ ಕವಿಯೇ,
ಬರೆದಿಡುತ್ತಾ ಕೂತರೆ
ಹೊಟ್ಟೆಗೆ ಹಿಟ್ಟು ಸಿಗೋದಿಲ್ಲ,ಅಷ್ಟೆ .





ಅವನ ಹಣೆಗಣ್ಣಿಗೆ ಚಾರ್ಜ್ ಆಗುವ ಸೂರ್ಯ
ಅವನು ದಣಿವಾರಿಸಿಕೊಳ್ಳುವ ಹೊತ್ತು
ಉರಿಯಲು ತೊಡಗುತ್ತದೆ.
ಹಗಲಿಡೀ ಅವನ ಕಣ್ಣು ಆಕಾಶದಲ್ಲಿ .





ಒಬ್ಬ ಕಲಾವಿದ ಕಂಡರೆ
'ಶಿವ'ನ ನಿಜರೂಪ ಬಿಡಿಸಲು ಹೇಳಬೇಕು
ಮುಂಜಾವ ರಬ್ಬರ್ ಟ್ಯಾಪಿಂಗ್ ಮಾಡಲು ಹೊರಡುವ ಹೊತ್ತು .
**

-ಕಾಜೂರು ಸತೀಶ್

No comments:

Post a Comment

ಅನ್ಯಾಯ

ಲೋಕ ನುಂಗಿದವನ ಕಾಲಡಿಗೆ ಒಂದು ಬಾಳೆಹಣ್ಣು ಕದ್ದು ಸಿಪ್ಪೆ ಎಸೆದವನ ಕೊರಳಿಗೆ ಒಂದು ಹಗ್ಗವನ್ನು ಅಂಟಿಸುವುದಾದರೆ ಆ ಹಗ್ಗ ನೇಯ್ದವನ ಬೆವರು ಅನ್ಯಾಯವಾಗಿ ಆತ್ಮಹತ್ಯೆ ಮಾ...